Hyderabad: Janoobi Hhindustani Film duniya se talluq rakhnay wali maroof adakara Kajal Agarwal ki Mumbai se talluq rakhnay walay Businessman Gautam Kichlu se shadi honay ke baray mein qiyaas aaraiyan August mein jungle ki aag ki terhan phail gayeen theen lekin adakara ne is muamlay par khamoshi barqarar rakhi jis ke baad mein yeh khabar bhi dam toad gayi lekin ab yeh khabar jaise hi manzar aam par ayen Social Media par is ke khoob charchay honay lagey hain jis ke baad adakara ne bazabta elaan karte hue kaha ke shadi 30 October ko Mumbai mein ek choti aur khangi taqreeb hogi.
Unhoun ne kaha yeh batanay se mujhe be had khushi ho rahi hai ke mein ne 30 October 2020 ko Mumbai mein Gautam Kichlu se shadi karne ka faisla kiya hai jis mein hamaray ghar walay shareek hon ge aur yeh ek choti aur khangi taqreeb hogi. Kajal ne mazeed kaha ke is wabai bemari ne yaqeenan hamari khushi ko maand kiya hai lekin hamein mil kar apni zindagi ka aaghaz karne par khushi hai aur jantay hain ke aap sab apni naik tamannaon ke sath hamari hosla afzai karen ge. Unhoun ne mazeed kaha ke aap ne kayi barson se mujh se jo mohabbat ki thi is ke liye aap ka shukriya ada karti hon.
Kajal ne wazeh kardiya ke woh shadi ke baad bhi kaam jari rakhen gi. Kajal ne kaha ke mein ab bhi wohi kaam jari rakhon gi jis ko mein sab se ziyada pasand karti hon. Apne madahon ko tafreeh faraham karti rahon gi, Ab yeh ek bilkul naye maqsad aur maienay ke sath hoga. Aap ki khatam nah honay wali mohabbat ke liye aap ka shukriya.
Gautam Mumbai ke Cathedral and John Connon School ka sabiq taalib ilm hain aur is ne Tufts University mein apni aala taleem mukammal ki hai. Instagram Bio ke mutabiq, Wo Discretionary Living ke maalik hain jo kay Interior Design aur gharelo sajawat ke liye E-commerce mansobah ki sahuliyaat faraham karta hai.