Seoul: Cyber duniya mein aeye din taiz se taiz tareen moslati rabtoun ko yaqeeni bananay mein taraqqi Yafta mumulk koi kasar nahi chodh rahay hain yeh hi wajah hai ke 3G aur 4G ke baad ab 5G ke shobay mein bhi ahem paish Raft horahee hai. Junoobi Korea ne is zimn mein ek ahem kamyabi haasil karli hai jaissa ke is ne duniya ke sab se baday 5G net work ka aaghaz kar diya hai. is technology ke zareya sarfeen ko taiz tareen wireless technology ki sahuliyaat muyassar hongi .
Junoobi Korea ki telecom ki sahulaten faraham karne wali teen badi companian, SK telecom , KT aur LGU+ ne apni 5G khidmaat ka aaghaz kardiya hai. is se pehlay kaha gaya tha ke taiz tareen wireless service ka bhi iftitah April ke pehlay haftay may hoga. Junoobi Korea technology mein bartari ke liye duniya bhar mein shohrat rakhta hai aur Seoul 5G technology ko apni maeeshat ki taraqqi ke liye zurori samjhta hai. is se pehlay America , China aur Japan bhi is koshish mein they ke woh 5G technology ki khidmaat faraham karne walay duniya ke pehlay mulk ban jayen .
America ki wireless services faraham karne wali aik badi company Verizon 5G technology par taizi se kaam kar rahi hai aur awliyat haasil karne ki koshish mein is ne Chicago mein 5G ki khidmaat shuru kar di hain, lekin is se do ghantay qabal Junoobi Korea ne apni 5G khidmaat muta-arif karden hain. Junoobi Korea ki sab se badi telecom company SK Telecom ke Bamuwajib ibtida mein 6 mashhoor shaksiaat ko 5G khidmaat faraham ki gayi hain jin mein pop bend execute ke do arkaan aur Olympic ice skating ke mashhoor khiladi shaamil hain .
Junoobi Korea ki, KT aur LGU+ ne bhi 5G ki khidmaat ek sath shuru ki hain. aam sarfeen ko un khidmaat ki farahmi jummay se shuru hogayi hai. sarfeen Samsung Galaxy S10 ke zareya 5G ka faida utha satke hain kyunkay yeh duniya ka pehla aisa phone hai jis mein 5G ke signals wusool karne ki sahoolat mojood hai. mahireen ne kaha hai ke 5G ke zariye internet ki raftaar 4 jee ke muqablay mein 20 gina ziyada taiz hogi. is technology ke zareya mustaqbil mein khudkaar driving jaisi devices bananay mein madad mileygi aur 2034 tak duniya ki maeeshat mein 5G khidmaat ki madad se 565 billion dollars ka izafah honay ki tawaqqa hai . –YTN STAFF