Chennai : Junoobi Hindustan ki filmy aur gaane aalmi satah par kayi ek records apne naam karne aur kamiyabiyan haasil kar chukay hain aur ab un mein ek naya izafah sun-hua hai.
Markazi kirdaar ada karne walay Dhanush aur Sai pallavi par filmiya gaya gana “Rowdy Baby” youtube par ek naya record qayam karchuka hai aur yeh musalsal maqboliat ke naye records qayam kar raha hai. film Maari 2 ka yeh geet Rowday Baby ko mashhoor dancer Prabhu Deva ney Choreograph kiya hai aur yeh youtube per maqbooliyat ka naya record qaim karte hue ab tak 300 million nazreen ki janib se dekha janay wala Junoobi Hindustan ka maqbool tareen gana hai, husn ittafaq se is se qabal 200 million shaiqeen ki janib se jo gana dekha gaya tha woh bhi sai pallavi ka hi gana hai jo film fida ka gana’ vachinde hai. Rowdy Baby gana junoobi hindustani filmoun mein sab se ziyada maqbool honay wala gaane ka record bhi haasil karchka hai kyunkay is mein Dhanush aur sai pallavi ke dance ko kaafi pasand kiya ja raha hai.
Tik tok videos par noujawan is gaane ki naqal bhi utaar rahay hain. is film ki mouseeqi ko yovan Shankar raja ney tarteeb diya hai. Balaji Mohan ki is film ka markazi khayaal darasal gangster drama hai lekin yeh film box office par kamyaab tareen filmoun mein shumaar nahi ho payi hai.Rowdy Baby gaane mein sai pallavi ke dance ko kaafi pasand kiya ja raha hai aur umeed ki ja rahi hai ke youtube par ye gana maqboliat ki mazeed bulandiyoun ko haasil kere ga.