Riyadh: Saudi Arab mein judwaa bhaayo ney khudkar Sanitizing Robot tayyar kiya hai. Tafseelaat ke mutabiq dono bhaayo Amad aur Maaz Al-Amudi ki omar 14 baras se ziyada nahi. Dono ney Malaysia mein zehni hisaab ke bain ul aqwami muqablay mein musalsal 2 martaba pehla maqam haasil kiya.
Corona ke dinoun mein House Isolation ke douran milnay walay waqt se faida uthatay huve unhoun ne khud-kar Sanitizing robot tayyar kiya hai. Amad aur Maaz ne bataya ke Curfew ke douran 24 ghante ghar mein guzaar rahay they. Khayaal aaya ke kyun nah online masnoi zahanat ke liye robot programming ki taleem aur design seekha jaye. Khayaal ke atay hi is project par kaam shuru kardiya. Te kiya ke coronavirus se bachao ke liye khud-kar sanitizing tayyar karen ge.
Amad aur Maaz neh mazeed kaha ke curfew ke douran khud-kar sanitizing robot par kayi tajarbaat kiye. Halaat mamool par aaye tu robot par programming ki. Kayi tarameem kee ab ye robot umdah tareeqay se kaam karne laga hai. Unhoun neh kaha ke jaisay hi koi shakhs ghar mein daakhil hota hai robot surkh signal aur Alarm baja kar anay walay ko mutnabba karta hai ke Sanitizing zurori hai. Sanitizing se farigh honay par robot Green Signal deta hai.
Amad aur Maaz ne kaha hai ke ye kaam corona ki waba se nimatnay ke silsilay main apna kirdar-ada karne ki ek koshish hai. Hamara khawab tha ke waba se nimatnay ke silsilay mein hamara bhi hissa ho. Yaad rahay ke Maaz aur Amad judwan bhai hain. Dono UC Mas mein pehla maqam haasil kiye hue hain. Ye 12 se 14 baras ke liye khaas programs hai. Is omar mein bachoun ki zehni nashonuma taizi se hoti hai. Ye programme bachoun ki zindagi ke ibtidayi 12 baras se istifaday ke liye design kiya gaya hai.