Hyderabad. Cyberabad Police ne naabaalighon ke sath jinsi jarayim karne ki padaash mein 2 Teachers ko hirasat mein le liya hai. 2 asatiza Syed Akbar (55) aur d Santosh kumar (25) ko Police ne hafta ke din do alag alag cases mein giraftar karliya. Aik mulzim Syed Akbar government uppar primaray school Muchintal, Shamsabad mein Headmaster ki haisiyat se farayiz anjaam dey raha tha. Iss ne taaleem mein taawun karte hue aik sabiqa taliba ke sath taluqaat istewaar karliye. Baad azaan iss ne ladki ka aghwaa karte hue usay qilah Golconda le aaya aur khufia taur par iss ladki se shadi karli aur usay jinsi taur par harasan karna shuru kardiya tha. Doosra mulzim Santosh jo St. Agatha model school Sanathnagar mein teacher ki haisiyat se kaam karta hai, ishhq ke naam par dasvin jamaat ki aik Taliba ko phansa aur aur is ka jinsi istehsal kya. Iss ne ladki ko aik cell phone tohfa diya aur rafta rafta usay pyar ke daam mein phaans liya. Jab mutasirah lad ki ke walidain ne phone par un ki baton ka notice liya. Iss ne ladki ko apne rishta daaron ke ghar le gaya aur 12 dinon tak usay wahan Mahruse rakha aur is douran is ladki ka jinsi istehsal karta raha. Cyberabad Police ne un dono ko naabaalighon ke sath jinsi ziyadati karne ki ilzaam mein qanooni ahteyati hirasat (PD Act) ke tahet giraftar kya. Cyberabad Police Commissioner Mr. V Sajjanar ke mutabiq dono teachers ko giraftar karliya gaya. Unhon ne kaha ke un do teachers ne pyar ke naam par na baligh ladkiyon ko phaans kar un ka jinsi istehsal kya hai jis ki wajah se aam logon ka usatza par etemaad mutazalzal hogaya hai aur iss se saari tadrisi bradari ki tazleel hui hai. Iss tarha ke waqeat se deegar larkiyan nah sirf khaufzadah hain balkay school jane mein khud ko ghair mehfooz samajhney lagi hain.