Jeddah: Saudi Arab ke shehar Jeddah ke King Abdalaziz Hospital ka ek mareez Saudi Halal Ahmar ki Aambulance chori karkay faraar hogaya. CCTV cameron ki madad se chori ki waardaat record hogayi. Mauqa par mojood logon ne roknay ki koshish ki thi taham mareez Ambulance le jaane mein kamyaab ho gaya.
Tafseelaat ke mutabiq dawakhane ke ek Guard nay Ambulance ko le jaane se roknay ki koshish ki thi. Video se pata chala ke Guard gaadi ke neechay anay se baal baal bach gaya. Saudi Halal Ahmar ke tarjuman Abdallah Abbu Zaid nay kaha hai ke Halal Ahmar ki ambulance ki chori ka waqea social media par Viral hogaya. Ye waqea is waqt pesh aaya jab Halal Ahmar ki medical team nay ek mareez ko dawakhana muntaqil kiya.
Isi douran waardaat karne wala mareez Ambulance par sawaar huwa aur security guards ki muzahmat ke bawajood ambulance le kar faraar hogaya. Abbu Zaid ne bataya ke mareez ne gate se nikalny ke baad gaadi dawakhane se mut-tasil ek station par chod di thi. Station ki intizamia ne is ki ittila police ko di jis ke baad ambulance ko wapas le jaya gaya.