Hyderabad. Yaum e Azadi tqarib ke paish e nazar aaj ilaqa Golconda mein Police ne ghar ghar talashi muhim shuru ki. Yaad rahay ke Golconda ke daman mein hi Chief Minister Mr. K. Chandarshekar Rao 15th August ke mauqa par rasam parcham kushai anjaam dete hain. Is khusoos mein DCP West Zone ki nigraani mein aaj raat Golconda Police Station hudood mein ghar ghar talashi muhim chalaye gayi. Taqreeban 210 Police ki do teams ne Cordon and Search mein hissa liya. Is muhim mein 400 makanaat ki talashi li gayi. Police ne 22 mushtaba afraad ko hirasat mein le liya jin ke mujrim anaasir ke sath taluqaat they jabkay aik Rowdisheeter ko bhi hirasat mein liya gaya hai aur munasib dastawizaat na honay ki binaa par 44 gadiyon ko bhi zabt karliya. Additional DCP Mr. Venkateshwar ne Media se baat cheet karte hue bataya ke aman o amaan ki barqarari aur ghair samaji anasir ki sarkoobi ke liye ghar ghar talashi li gayi. Unhon ne kaha ke is muhim ke dsuraan Police ko muqami awaam ka bharpoor taawun haasil raha hai. Unhon ne kaha ke yeh muhim muqami awam ki khwahish aur rowdii anaasir ki srgarmyon se mutaliq shikayaat ki asaas par chalayi gayi.