Jammu : Jammu & Kashmir ke lieutenant Governor Girish Chandra Murmu ne jumeraat ke roz kaha hai ke markazi hukoomat ke zair-e-intezaam khittay ki Assembly ke liye intekhabaat jald hi honge. unhoun ne kaha ke Jammu & Kashmir ke markazi elaqa jaat ki ek Assembly hai, jis ke liye jald hi intikhabaat ka ineqad amal may laya jayega“.
Marmu ne Jammu khittey ke riyasat may Talwara may police ki passing parade ke mauqa par ye baat kahi, aur kaha ke intekhabaat ke ineqad ka amal shuru ho chuka hai. unhoun ne kaha ke inhein umeed hai ke Lok Sabha intekhabaat ki terhan, awaam Assembly intekhabaat may bhi hissa lenge. unhoun ne police ehalkaroun se mukhatib ho kar kaha ke ”ayenda intekhabaat may aap ka ahem kirdaar hoga“.
31 October ku markazi zair-e-intizam ilaqa Jammu & Kashmir ke pehley lieutenant Governor ka huhda sambhalne ke baad Governor Girish Chandra Murmu ki ye pehli awaami taqreer thi. wazeh ho ke markazi hukoomat ne ek tareekhi faisla letay huve 5 August ku Jammu & Kashmir ku khusoosi darjah dene waley ayeen ke Article 370 ko mansookh kardiya tha aur Jammu & Kashmir aur Ladakh ko 2 markazi zair-e-intizam ilaaqoun may taqseem kardiya tha.
markazi hukoomat Article 370 ko mansookh karne ke baad siyasi khala ko par karne ke liye jadujehad karrahi hai. 5 August se hi Kashmir ke ahem siyasi qaideen, Farooq Abdullah, Omar Abdullah aur Mehbooba Mufti zair-e-hirasat hai. Centaur hotel, jisko sab Jail qarar diya gaya hai. wahan mukhtalif siyasi jamaatoun ke 50 se zayed siyasi rehnuma nazar band hain. – YTN STAFF