New Delhi: Jamia Millia Islamia university ke talba ka parliament jane wala March jummay ko police ki janib se is ehtijaj ko roknay ke liye lathi charge ke baad ye pa-tashadud ho gaya. All India Student Association se talluq rakhnay walay talba shehriat tarmeemi bill ke khilaaf ehtijaj kar rahay they. Talba aur police ke darmain jhadap ki wajah se media ke kayi numainday bhi zakhmi ho gaye.
Ehtijaj ke baad, Socail media par mutadid paighamaat gardish karne lagey, Jin mein talba se, jari amthanat sameit sabhi taleemi sargirioun ka boycott kar ne ko kaha gaya. Ittila ke mutabiq talba ki janib se nikalay gaye is March mein muqami loog bhi shaamil hoye, Jinhon ne police ehalkaroun par pathrao kiya, Jinhoun ne is ehtajaji March ko roknay ke liye ansoo Gas ke golay dale aur lathi charge kiya, Jis se mutadid talba zakhmi ho gaye. Aur inhen holi family hospital mein daakhil karaya gaya.
Talba ne university ke gate number ek ke bahar lagaye gaye bhaari rukavatoun ko todnay ki koshish ke baad police ne lathi charge ka hukum diya. Jawabi karwai mein, Talba o deegar afraad ne police ehalkaroun par pathrao shuru kiya, Jis ke baad police ne ansoo gas ke golay dale.
3 ghantay se ziyada woqt tak jari rahay is ehtijaj ke douran talba ne media ehelkaroun par bhi hamla kiya. Sabiq rukan parliament Parvez Hashmi ne muzahireen ki numaindagi karte hue mutalba kiya ke Delhi police sabhi hirasat mein liye gaye muzahireen ko reha kar dein, Sath hi kaha ke jummay ke waqeat ke bad muzahireen ke khilaaf koi muqadma darj na karen.
Wazeh ho ke shehriat tarmeemi bill ki mukhalifat mein kiye gaye is ehtijaj ke douran sorat-e-haal ko qaboo karne ke liye police ne 50 ke qareeb muzahireen ko hirasat mein le liya, Jaitpur aur Badarpur thanon mein le jaya gaya. –YTN STAFF