New Delhi: Delhi mein jumaraat ki dopehar Jamia University ke qareeb Shehriat Tarmeemi Qanoon ( CAA ) ke khilaaf jari ehtijaj mein 1 shakhs ne khulay aam bandooq liye ghus jany aur Firing karne ke waqeye par siyasat garam hogayi hai. mazkorah waqeye ke baad, AIMIM ke rehnuma Asaduddin Owaisi ne wazeer aazam Narendra Modi aur BJP ke rehnuma Anurag Thakur par hamla kiya.
Asaduddin Owaisi ne tanz karte hue kaha hai ke ”Wazir aazam ko ab usay kapdoun se pehchanana chahiye, Unhoun ne BJP ke rehnuma Anurag Thakur par bhi hamla kiya. Jinhoun ne mutanazia bayan diya tha aur kaha tha ke mulk ke ghaddaroun ko goli maro. Asad Owaisi ne un par sakht tanqeed ki.
Wazeh ho ke’ Jamia Millia Islamia University ke talba Raj Ghat tak paidal yatra karne ki tayari kar rahay they, Tabhi ek namaloom nojawan un ke paas aaya aur naaray laganay laga aur ”Ye lau aazadi“ Kehte huve Firing kardi. Jis ke nateejay mein Shadaab nami taalib ilm zakhmi hogaya, Usay Holi family hospital mein daakhil karaya gaya.
Firing karne walay nojawan ki Ram Bhagat Gopal ke tor par shanakht hui hai aur police is ko tehweel mein leker pooch tach kar rahi hai. Is waqea se police ki tasahli saaf zahir hoti hai, Kyunkay wo nojawan police ke samnay hi Firing karta raha tha aur police tamashaayi bani hui thi. –YTN STAFF