New Delhi : Indian union muslim league ki janib se jumeraat ko Supreme court mein ek writ petition dair ki gayi hai, jis mein yeh daawa kiya gaya hai ke chaharshambeh ke roz parliment ke zareya Manzoor kardah shehriat tarmeemi Bill 2019 aeen ke Article 14 ki khilaaf warzi karta hai.
Darkhwast mein kaha gaya hai ke is Bill mein logoun ko mazhab ki bunyaad par ghair qanooni qarar diya gaya hai. Darkhwast guzaar ki taraf se senior advocate Kapil sibal pesh honge.
Rajya sabha ne chaharshambeh ki shaam ko Pakistan, Afghanistan aur Bangladesh se talluq rakhnay walay ghair muslim muhajreen ko hindustani shehriat denay ki koshish ke mazkorah Bill ko manzoori dedi. opposition ne is Bill ko imtiazi sulooq qarar diya hai.
Mazkorah shehriat tarmeemi Bill ki manzoori ke liye Rajya sabha mein voting karai gayi, is Bill ke haq mein 125 vote pade aur iski mukhalfat mein 105 vote pade. –YTN STAFF