Baghdad: Iraq ke Wazeer-e-Azam Adil Abdul-Mahdi hafta ko 5 bajey curfew hataane ka hukum de sakte hain. iski ittila muqami media ne di hai. khayaal rahay mulk bhar mein hukoomat ke khilaaf horahay ehtijaj ke baad markazi hukoomat ne kayi muqamat par curfew laga diye they.
Muqami channels ke mutabiq agarchay kin ilaaqon mein curfew hataye jayenge iske baarey mein abhi koi ittila nahi mili hai. Qabil-e-zikar hai ke hukoomat ke khilaaf mukhtalif masail par Iraq ke mukhtalif shehroun mein kuch dinoun se ehtijaj wo muzahiray ho rahay hain.
Iraq mein hukoomat ke khilaaf horahay ehtijaj wo muzahiron ke douran runuma honay walay tashadud mein marnay waloun ki tadaad badhkar 65 hogayi hai. Iraq insani huqooq ki tanzeem ke sarbarah mustafa ne kaha ke tashadud mein marnay walon ki tadaad 50 ke paar pohanch gayi hai jabkay zakhmion ki tadaad 1936 hai.
Qabil-e-zikar hai ke Iraq mein baghdad aur mukhtalif shehron mein guzashta mangal se iqtisadi bahaali aur bad-unwani khatam karne ka mutalba karte hue muzahireen jagah jagah ehtijaj kar rahay hain. is douran security forces ki janib se muzahireen par pani ki bocharein maarne aur ansoo gas ke golay chodey jane ke baad tashadud bhadak jane se wahan halaat mazeed kasheeda hogaye hain. –YTN STAFF