Tehran: Americi media ne Iran ke sarkari TV channel press TV ka hawala dete hue kaha hai ke Iran ki musallah afwaj ne tasleem kiya hai ke Ukraine Airlines ke musafir tayyaray ko nishana banana insani ghalti thi, Aur ye ke Iran ne ghair iraadi tor par tayyaray ko nishana banaya.
Tafseelaat ke mutabiq Iran ki musallah afwaj ne Ukraine musafir tayyaray ko mukhalif jahaaz samjha. Iran ke wazeer kharja Javad Zarif ne twitter par apne bayan mein aitraaf kiya ke ye ek afsos naak din tha. Insani ghalti Americi muhim joi se peda honay walay tanao se hui jis ki wajah se ye tabahi hui. Musallah afwaj ki tehqiqaat ke mutabiq ye waqea ghalti se pesh aaya. Hum mutasirah khandano ke sath afsos aur hamdardi ka izhaar karte hain.
Wazeh rahay ke Canadian wazeer e azam Justin Trudeau ne daawa kiya tha ke hamaray paas mutadid zaraye se ye maloomat samnay aayi hain jin mein hamari apni aur hamaray itihadiyoun ki maloomat bhi shaamil hain ke Ukraini tayyaray ko Iran ke zameen se fiza tak waar karne walay missile ne nishana banaya aur aisa ghalti se ho sakta hai.
Is se qabal Americi ohdedar ne bhi kaha tha ke Ukraine ke musafir tayyaray ko ghalti se Irani missile lagey. Ek Americi ohdedar ne kaha hai ke satellite data ke mutabiq Ukrainin International Airlines ke bowing tayyaray ko Ukrain ke dar-ul-hakoomat Kyiv ke liye Tehran se udan bharay 2 minute hi hue they ke jab missilon ki huva mein mojoodgi ka pata laga. Unhoun ne mazeed kaha hai ke is ke foran baad tayyaray ke nazdeek dhamaka huva. America ka maanna hai ke America aur Iran ke darmain barhatay tanao ke waqt tayyaray ka girna ek haadsa tha. –YTN STAFF