New York: Iran ki Al Quds force ke sarbarah general Qasim Soleimani ki halakat se peda honay wali kasheeda sorat e haal ke rad-e-amal mein Americi Senators ne naya bil muta-arif karwanay ka elaan kiya hai jis ke tehat sadar Donald Trump ko Iran ke khilaaf taaqat ke istemaal ke liye congress se manzoori lena hogi. Americi sadaarti umeed waar senator Bernie Sanders aur senetor Rohit Khanna ki janib se aaj jari bayan mein kaha gaya hai ke congress aisay kisi fund ki manzoori nahi digi jo Iran mein ya is ke khilaaf jungi karwai ke liye istemaal ho. Doosri janib Americi sadar ke mutabiq Qasim Soleimani ko maarne ka faisla jung roknay ke liye kiya gaya.
Bernie Sanders ne kaha hai ke naya qanoon Americi sadar ko Iran ke khilaaf jung ke yaktarfa faislay se rokay ga. Senators ne Americi ewaan numaindgaan aur senate se ye bil jald manzoor karne ko kaha hai taakay congress apni aaeni zimma daari nibha sakay. Senators ke bayan ke mutabiq ek baar phir aisay khatarnaak halaat peda horahay hain jo mashriq wasti mein ek aur tabah kun jung ki taraf le ja rahay hain. Iran ke sath jung se mutadid jaanen zaya hongi aur mazeed Arbon Dollar kharch honge, Kasheedgi badhaygi, Aur mazeed loog be ghar honge.
Bain ul aqwami taluqaat mein jung aakhri harba hona chahiye. Isi liye hamaray baneoun ne jung ka maamla congress ke zimma kiya tha. Is se qabal sadar Donald Trump ne ek mukhtasir press conference mein kaha ke Americi fouj ne un ki hidaayat par duniya ke awleen dehshat gard Qasim Soleimani ko halaak kiya hai. Sath hi sadar Trump ne Americi policy wazeh karte hue kaha ke jo dehshat gard Americion ko nuqsaan pohanchate hain ya nuqsaan ka iradah rakhtay hain, Hum aap ko talaash karenge, Hum aap ko tabah kar denge. Hum hamesha apne sefartkharoun, Fojioun, Tamam Americion, Aur apne itihadiyoun ka tahaffuz karenge.
Trump ne mazeed kaha ke Soleimani Americi sefartkaroun aur fouji ehalkaroun par hamlay ka mansoobah bana raha tha, Lekin hum ne usay pakad liya aur khatam kar diya. Kayi saal se Soleimani ki leadership mein al Quds force ne senkdoun Americi shehrioun aur fojioun ko halaak, Zakhmi aur nishana banaya. Sadar Trump ne mazeed kaha ke America ab sukh ka saans le sakta hai ke general Qasim Soleimani ki dehshat khatam hogayi hai. Trump ne wazeh kiya ke unhoun ne general Soleimani ko halaak karne ka iqdaam jung shuru karne ke liye balkay jung khatam karne ke liye kiya hai. Sath hi Trump ne kaha ke wo Irani qoum ki izzat karte hain aur Iran ki mojooda hukoomat ko tabdeel karne ke khwahish mand nahi hain. –YTN STAFF