YERUSHALAYIM: Israel ki wazarat difaa ne kaha hai ke ek naye jasoos satellite ko launch kiya hai. Israeli wazarat difaa ki janib se jari bayan ke mutabiq ye is ka taaza tareen asasa hai jo is ke Azli dushman Iran ke khilaaf tainaat hoga.
Wizarat ne bayan mein kaha Israel ki wazarat difaa aur Israel Aerospace Industries ne muqami waqt ke mutabiq subah 4 bajey kamyabi ke sath Ofek 16 jasoos satellite ko launch kiya hai.
Israeli wazarat difaa ne mazeed kaha jaded tareen salahiyatoun wala Electro-Optical jasoos satellite kayi tests se guzray ga. Israel ke wazeer difaa aur agli baari ke liye naamzad Wazeer e Azam Benny Gantz ne is peshraft ki tareef ki hai. Unhoun ne kaha Israel ke difai shobay ke liye ratoun raat Ofek16 satellite ka kamyaab aaghaz ek aur ghair mamooli kamyabi hai.
Israel ki salamti ke liye takneeki bartari aur zahanat ki salahiyaten zurori hain. Hum har mahaaz par har jagah Israel ki salahiyatoun ko mustahkam aur barqarar rakhna jari rakhen ge. Bayan mein satellite ke mission ke baray mein mazeed tafseelaat nahi di gayeen lekin Israeli Radio ne kaha hai ke is ka istemaal Iran ki johri sar garmioun ki nigrani ke liye kiya jaye ga.