Melbourne: Australia ke sabiq Cricket Captain Michael Clarke ne Australia Team ke baray mein mutanazia bayan dete huve kaha hai ke IPL mein ahcha moahida haasil karne ki wajah se Australia khiladi Hindustani Captain Virat Kohli ke tain naram rehtay hain aur un ki sledging ( fiqray baazi ) karne se dartay hain. Clarke neh Big Sports Break Fast par baat cheet mein kaha ke sab jantay hain ke IPL ke sath bain ul aqwami ya gharelo satah par khail ke maliyati hissa ke tor par Hindustan intahi taaqatwar hai. IPL to waisay bhi be shumar dulat se bharpoor hai jahan khiladioun ko mouti raqam millti hai. Mujhe lagta hai ke Australia Cricket ya phir duniya ki koi aur deegar Team Hindustan ke khilaaf intahi naram hogayi hai.
Koi bhi khiladi ya Team Kohli ya kisi dosray Hindustani khiladi ki sledging karne se bohat dartay they kyunkay inhen April mein unhi ke sath IPL khelna hota hai. Australia ku Hindustan se pichli gharelo Test Series mein pehli martaba 1-2 se shikast ka saamna karna pada tha. Is Series mein Australia Team Steve Smith aur David Warner ke baghair kheli thi jis mein ye 2 ahem khiladi gaind se chaid chhad karne ki wajah se 1 saal ki pabandi bardasht kar rahay they. Clarke neh kaha ke ye aisa daur tha jab Australia khiladi Kohli ki sledging karne se bach rahay they. Sabiq Captain Clarke ne Programme ke douran kaha ke khiladioun neh ek terhan se Kohli ki sledging karne se inkaar kardiya tha kyunkay wo shayad Bangalore ki Team mein shaamil hokar 10 crore ka moahida haasil karna chahtay they.
Mera Khayaal hai ke ek waqt aisa tha jab hamaray khiladi naram hogaye thay ya itnay mazboot nahi nazar aaye jitne aam tor par nazar atay hain. Ghhor talabb hai ke 2019 Decemeber mein IPL ke liye huvi nelamee mein Australia ke Fast Bowler Pat Cummins 15.5 Crore rupay mein Calcutta ki Team mein shaamil huve thay jo IPL ki tareekh mein kisi bairooni khiladi ke liye aaj tak ki sab se badi raqam hai All Rounder Glenn Maxwell ko Punjab ney 10.75 crore rupay aur Nathan Coulter-Nile ko Mumbai Indian ne badi boli laga kar 8 crore rupay mein khareeda tha. Is ke alawa l-Rounder Marcus Stoinis ko Dehli Capital ney 4.8 crore, Captain Aaron Finch ko Bangalore ney 4.4 crore, Alex Carey ko Delhi ne 2.4 crore, Mitchell Marsh ko Hyderabad ne 2 crore aur Josh Hazlewood ko Chinaai Super Kings ne 2 Crore aur Andrew Tye ko Rajasthan Royals ne 1 crore rupay mein khareeda tha. Clarke khud bhi IPL mein Pune ki taraf se khailay they. Clarke ka maanna hai ke Australia khiladi Test Series ke douran apne rang mein nahi they aur unhoun ne ladnay ka jazba nahi dekhaya. –YTN STAFF