Jakarta: Jazeera sumitra mein selaab aur zameen khisakne se kam az kam 17 afraad halaak aur hazaroun ki tadaad mein awam be-ghar hogaye jabkay kayi imaartoun, sadkoun aur puloun ko bhi nuqsaan pouncha .
Tafseelaat ke mutabiq muqami intizamia ne kaha ke soobah Bangkolo ke 9 azlaa mein selaab aur zameen khisakne se shadeed nuqsaan pohuncha hai jahan 13 hazaar se zayed afraad beghar hogaye hain jabkay senkdon imaarton, pulon aur sadkon ko nuqsaan pohuncha hai .
National Disaster Agency ke tarjuman ne kaha ke selaab ke asraat mazeed badh sakte hain jabkay selaab se senkdon afraad zakhmi ho chukay hain. agar barish ka silsila jari raha to zameen khiskane aur mazeed selaab aasakta hai. taaza soorat e haal se mutaliq unhon ne kaha ke jaldi bimarion, safai nah honay ke baais maiday mein infection aur saaf pani ki Adam farahmi ki wajah se dosray bohraan peda ho chukay hain. mutasirah ilaqon se haasil honay wali tasaveer aur videos mein dekha ja sakta hai ke soobay ke chand ilaqon mein selaab darya ki shakal ikhtiyar kar raha hai .
Hukoomat ki janib se imdadi kaam ka silsila jari hai aur mutasireen ke liye kitchen aur panah gaahon ka intizam kya gaya hai jahan taqreeban 13 hazaar mutasireen ko rakha gaya hai jabkay imdadi karkun mutasirah ilaqon tak pounchanay ke liye kashtiyon ki madad se koshisho mein masroof hain .
National Disaster Agency ke tarjuman ke mutabiq mutasirah ilaqon mein sadkon ko nuqsaan pohuncha hai jis ke baais imdadi ashya pohanchanay mein mushkilaat ka saamna hai taham sadkon ko bahaal karne ke liye kaam jari hai. khayaal rahay ke Indonesia mein monsoon season mein zameen khiskane aur barishoun se selaab mamool hai jahan october se April ke douran shadeed barishain hoti hain. Indonesia duniya ke un chand mumalik mein se ek hai jo aksar tabah kin zalzloun, selaab aur Tsunami ki zad mein rehtay hain. guzashta hafta dar-ul-hukoomat Jakarta sameit kayi ilaqoun mein bhi selaab aaya tha jis mein kam az kam 2 afraad jaan bahaq hue they aur taqreeban 2 hazaar afraad ke gharon ko nuqsaan pouncha tha. guzashta mah mashriqi soobah Papwa mein bad tareen selaab ke nateejay mein 50 afraad halaak hue they jabkay hukkaam ke mutabiq selaab ke nateejay mein kam az kam 70 afraad zakhmi aur 15 la patah ho ye hain jabkay aafat zada ilaqay tak pounchanay mein mushkilaat ke sabab halakaton mein mazeed izafay ka khadsha hai .– YTN STAFF