Laknow: Muradabad ke zilai intizamia ne shehriat tarmeemi qanoon ( CAA ) ke khilaaf muzahiroun mein mulawis honay aur dafaa 144 ki khilaaf warzi karne par nowjawan shayar aur Congress ke rehnuma Imran Pratapgarhi ko 1 crore 4 lakh 8 hazaar rupay jurmane ka Notice bhijwaya hai. Beje gaye Notice mein zilai intizamia ne CAA ke khilaaf ehtijaj mein yomiya akhrajaat 13 lakh 42 hazaar rupay darj kiye hain jo 29 January se Moradabad mein jari hai.
It-tila-aat ke mutabiq, Moradabad muzahiray ko qasbay ki samaji hum ahangi ke liye khatrah qarar diya gaya hai, Jis se zilai intizamia ko aman o aman barqarar rakhnay aur kisi bhi nakhushgawaar waqeye ki rokk thaam par kharch karne par majbor kiya gaya hai. Congress ke qayed ke khilaaf Notice jari karte huve intizamia ne Pratapgarhi par ilzaam lagaya hai ke wo awam ku shehiriyat tarmeemi qanoon ke khilaaf ehtijaj karne par aksata hai.
Eid gah mein haliya ijtima mein Pratapgarhi ne kaha pichlle kuch dinoun mein hum ne aisi tasaveer aur videos dekhe hain jin se hamaray zehan mein ye sawal peda hota hai ke hamara mulk kahan ja raha hai. Hamari baityuon aur bhenoun ko police musalsal tashadud ka nishana bana rahi hai. Mein aur bhi is terhan ki tamam therikoun mein hissa laita rahon ga. Ye hukoomat hamari aawaz ko daba nahi sakti. Intizamia ne mujhe ek Notice bheja. Mein daikhoun ga ke kaisay jawab diya jaye. Mein high court se rujoo karonga aur agar zaroorat ho to Supreme court ko bhi jaunga. –YTN STAFF