IBM Se Mulazmeen Ki Bartarfi Ke Baad Hyderabadi Professionals Zehni Dabao Ka Shikaar

Hyderabad: Multi National companies ( MNC’s) mein mulazmat aur Shandar tankhwahoun ka khawab har nojawan dekhta hai aur hyderabad mein Hitec city dour-e-jadid mein mulazmatoun  ka ek   markaz tasawwur kiya jata hai yahan duniya ki kayi Maroof companian moujood hain jis mein Micorsoft , Google ,  IBM CISCO waghera qabil-e-zikar hain hain lekin multi national companiyon mein mulazmat ka ek  manfi pehlu yeh bhi hai ke aeye din kuch nah kuch aisi khabrain manzar-e-aam par aati hain jo mulazmat anjaam dainay walon ke liye zehni dabao aur deegar masail ki wajah banti hain. is waqt  IBM se ek  manfi khabar aa rahi hai jisakah company ne darmiyani zamray ke kayi mulazmeen ko ohdon se bar tarf kar diya hai. IBM ke hyderabad camps se 300 aisay professionals ko mulazmat se bar tarf kardiya gaya hai jo ke banglore ke alawa dosray shehron se talluq rakhtay they jis ke baad hyderabad se talluq rakhnay walay mulazmeen mein ek  qisam ka khadsha paya jaraha hai .

 IBM company mein senkdon mulazmeen ko baghair kisi notice ke mulazmat se bartarf kardiya gaya hai jis ki wajah se woh zehni tanao mein mubtala ho chuke hain. darin asna union yeh batanay se qassar hai ke company ki janib se kitney mulazmeen ko ohdon se bar tarf kardiya gaya hai lekin yeh koshish ki jarahi hai ke mehakma labour se jald az jald rujoo hotay hue is masla ki yaksoi ki jaye. doosri janib company ka mouqoof hai ke unhon ne jin mulazmeen ko ohda se bar tarf kiya hai woh kisi qisam ki koi na-insafi nahi hai balkay naye Asri taqazoon ko poora karne ke liye yeh iqdamaat kiye jaaane zurori they. maana ja raha hai ke yeh company ke sharait ke mutabiq hi kiya jaaane wala faisla hai.  IBM ki janib se ohday daaron ke bar tarf kiye jaaane ke mutaliq tasdeeq ke liye rabita karne par is mein kamyabi haasil nahi hui aur yeh nahi maloom hua hai ke hyderabad division ke kitney ohday daaron ko bar tarf kiya gaya hai. doosri janib Ranga reddy zone ke labour department ke joint commissionaire are chandrashekhar ne kaha hai ke un ke mehakmay ko is tarhan ki koi shikayaat masool nahi hui hain taham woh is muamlay mein behtar tareeqay se paish qadmi karenge .

IBM ke hyderabad camps se mulazmeen ko bar tarf kiye jaaane ki musadeqa tadaad ka hunooz ilm nahi ho saka hai lekin IT zaraye ne kaha hai ke rawan season companiyon ki janib se mulazmeen ko bar tarf kiye jaaane ka ek mizaaj chal para hai. is khabar ke baad hyderabad se talluq rakhnay walay un mulazmeen mein tashweesh ki lehar payi jati hai jo ke mukhtalif companiyon mein darmiyani darjay ke ohdon par khidmaat anjaam day rahay hain aur inhen apni mulazmat khatray mein honay ki wajah se zehni dabao ka saamna karna pad raha hai. yahan is haqeeqat ko bhi nazar andaaz nahi kiya ja sakta ke multi national companiyon mein mulazmat anjaam dainay walay afrad ki tarz zindagi aam Hyderabadiyoun se kisi qader mukhtalif hoti hai kyunkay company se milnay wali achi thankhowa ki wajah se unki tarz zindagi bhi kisi qader shahana hoti hai aur ab jabkay ke mulazmatoun  par khatray ka nishaan lag chuka hai to un ke zehnon mein zindagi ke akhrajaat bardasht karne ke liye liye dosray zaraye mojood nah honay se se beshtar afraad zehni dabao ka shikaar ho chuke hain . –YTN STAFF