Hyderabad : Sirf 4 saal ki Umar mein hyderabad se America naqal makani karne wali professor Ghazala hashmi ne America mein ek aisi tareekh raqam ki hai jis par Hindustan fakhar kar raha hai.
Professor Ghazala apni pehli hi koshish mein Virginia ki senator muntakhib hogayi hain aur yeh karnaama anjaam dainay wali wo pehli muslim khatoon hain. goya ke is-se qabal koi bhi muslim khatoon America ke Virginia riyasat ki senator muntakhib nahi hui thi.
Dahaiyo se Virginia par republican ka qabza tha lekin mangal ko democrat professor Ghazala hashmi ne republican ko Iqtidaar se bahar ka rasta dikha diya. Ghazala ke liye yeh ek badi kamyabi hai ke unhon ne apni pehli hi koshish mein Guleen ko shikast day di. apni fatah ke baad Ghazala ne kaha ke yeh sirf meri fatah nahi hai. yeh un sabhi logon ki fatah hai jo yeh mante hain ke yahan Virginia mein kuch tabdeeli ki zaroorat hai. yeh un sabhi logon ki fatah hai jo yeh mante hain aur mujh par yaqeen karte hain ke mein un ki aawaz utha sakti hon.
Professor Ghazala ki kamyabi ke baad sabiq wazeer-e-kharja Hillary Clinton ne unhein mubarakbaad dete hue kaafi tareef ki aur umeed zahir ki ke woh Virginia ke liye acha qadam saabit hongi. kayi deegar badi hastiyon ne bhi democrat Ghazala ki kamyabi ko qabil-e-qader batatay hue unhein mubarakbaad paish kee.
Yahan qabil-e-zikar hai ke professor Ghazala Amrici sadar Donald trump ki sakht mukhtalif tasawur ki jati hain. Ghazala ne khud ek bayan mein kaha hai ke jis waqt sadar Donald Trump muslim tabqa ke khilaaf zehar ugal rahay they, tab mujhe lagta tha ke kiya woh kabhi is mulk ko apna ghar bhi maan sakengi. Aaj jab wo Virginia ki senator muntakhib hogayi hain to unki poori tavajja is ilaqay ki Falah wo behbood aur taraqqi ki taraf hai. Professor Ghazala bohat kuch karna chahti hain aur yeh saabit karna chahti hain ke virginia ke logon ne unse jo umeed ki hai is par woh khadi utregi. –YTN STAFF