Hyderabad: Teen Talaq ke mutaliq aaye din koi na koi khabar sahaafat ki zeenat banti hai aur ab ek hyderabadi 24 sala khatoon Saba fatima ne ilzaam aed kiya hai ke iske Shohar Abd walii Ahmed jo-ke somalia ka ek shehri jiski Amrici shehriat bhi hai is ne bilaa wajah phone par usay teen Talaq di. Ab yeh mutasirah khatoon markaz se is muamlay mein mudakhlat karne ki appeal ki. Hyderabad mein apne waalid ke sath rehne wali is khatoon ne wazeer baraay umoor kharja ko likhay gaye khat mein muamlay mein mudakhlat aur insaaf haasil karne mein madad ki darkhwast ki hai.
Khatoon ne kaha hai ke is ne 25 January 2015 ko Somalian shehri se is waqt shadi ki thi jab woh Hyderabad mein taleem haasil kar raha tha. Khatoon ke mutabiq iske baad se woh har 6 mah baad hyderabad aata tha aur aakhri baar is saal feb mein is se milnay aaya tha. Unhon ne mazeed kaha ke baad mein woh America mein Boston chala gaya iske baad bhi woh mere sath raabtey mein raha aur zarooriat ke liye raqam bhejta tha. Khatoon ne khat mein kaha achanak mere shohar ne mere waalid ke phone number par call kiya aur baghair kisi wajah ke teen baar Talaq ka elaan kiya aur iske baad se woh mujh se rabita nahi kar raha hai.
Meri saas jo Dubai mein rehti hain aur behan jo London mein rehti hain ne mujhe insaaf ki yaqeen dehani karwai lekin baad mein unhon ne mera number bock kardiya. Lehaza mein aap se darkhwast karti hon ke woh is muamlay mein mudakhlat karen aur mujhe insaaf dilanay mein madad karen.
Unhon ne wizarat-e-kharja se darkhwast mein mazeed kaha ke woh America mein hindustani sifarat khanaay se apne shohar se baat karen aur jald-az-jald maamla tay karen kyunkay iski dekh bhaal karne wala koi nahi hai aur wo baghair kisi mustanad Talaq ke kaghzat ke dobarah shadi nahi kar sakti hai.