Hyderabad: IPL 2019 ka hafta ko aaghaz ho raha hai aur is saal aik janib Mahendra Singh Dhoni ki zireqayadat Chennai Super Kings apne khitaab ka difaa kere gi to doosri janib 2018 main Final khailnay wali Sunrisers Hyderabad ki team bhi is martaba khitaab ke mazboot dawedaron mein shaamil hai. Hyderabadi team ke liye khushkhabri yeh hai ke kamyaab tareen Captain aur jarhana Opener David Warner ki wapsi huwi hai kyunkay guzashta baras woh Junobi Africa ke dora par maizban team ke khilaaf Ball Tampering ki Padaash mein pabandi ka shikaar they aur IPL bhi nahi khail paye they.
Hyderabadi team kayi aitbaar se mutawazan dikhayi dey rahi hai kyunkay jahan aik janib David Warner ki wapsi huwi hai wahein is Season ke liye chand aisay khiladi bhi team ka hissa ban chuke hain jo kay nah sirf team ko mutawazan banatay hain balkay tanha apni karkardagi se team ko kamyabi bhi dilwa satke hain. Hyderabadi team ki Batting ka tazkira kiya jaye tu aik arse taq inning ka aaghaz Warner ke sath Shikhar Dhawan karte aeye hain lekin is martaba Dhavan Hyderabadi team ka hissa nahi hai lekin un ke maqam par New Zealand ke jarehana opner Martin Guptill inning ka aaghaz kar saktay hain.
Hyderabadi team ke liye chaar behruni khiladion ke intekhab mein pheli pasand kon hon ge? yeh ahem sawal hai lekin imkanaat aisay nazar arahay hain ke David Warner aur Martin Guptill ke sath Afghanistan ke bowler Rashid Khan ke hamrah Captain Can Williamson pheli tarjeeh hon ge Williamson ki phelay muqaabla mein shirkat hanoz ghairyaqni hai kyunkay woh kandhe ki takleef mein mubtela hain. Un ke alawa England ke wicket keeper Jani Berestu ke sath Shakib Ul Hasan bhi sare fehrist bairooni khiladion mein shaamil hain.
Bowling shoba ka tazkara kiya jaye to Fast Bowling ki qayadat Bhuvneshwar Kumar karen ge jin ke sath Vijay Shankar jo pehli martaba Hyderabad ki numaindagi karen ge, ahem Bowler saabit ho saktay hain. Vijay Shankar ney Australia ke khilaaf haliya ekhtataam Pazeer oneday Series mein ghair mutawaqqa aur shandaar muzahiray karte huwe apni ahmiyat ko saabit kiya hai. Hyderabad ke liye Bowling shoba mein is martaba Kerala ke 25 sala Noujawan fast bowler Basel Thampi bhi tavajja ka markaz hon ge kyunkay inhen Hindustan ke liye mustaqbil ka fast Bowler tasawwur kiya ja raha hai. Is ke ilawa Khaleel Ahmed bhi team ke bowling shoba ko taqwiyat den ge jinhen Baynul aqwami Cricket ka bhi tajurbah hai.
Spin Bowling shoba ka tazkara kiya jaye to is martaba Hyderabadi Team ney Shahbaz Nadeem ko bhi haasil kya hai jo ke Yousuf Pathan ke sath darmiyani Overs ki zimme daari nibha satke hain. Hyderabadi Team ke liye IPL 2019 ke ibtidayi chand muqablay ahmiyat ke haamil hon ge kyunkay Warner aik saal ki wapsi ke baad musabiqati Cricket khelain ge aur un ka Form mein aana team ke liye zarori hoga. Doosri janib jo Nayee khiladi team ka hissa banay hain un ki humahangi ke sath Medal Order mein Yousuf Pathan aur Saqib Ul Hasan ko behtar muzahira bhi karna hoga kyunkay guzashta season yeh do ahem khiladi apne miyaar ke mutabiq muzahiray nahi kar paye they. Hyderabadi shaiqeen yahi umeed kar rahay hain ke 2018 main jahan Warner ke baghair team ney William Son ki qayadat mein final khela tha woh is martaba Warner ki aamad ke sath aik qadam mazeed agay barhatay huwe teesri martaba IPL ka khitaab apne naam kere kyunkay 2009 mein Adam Gilchrist aur 2017 mein David Warner Hyderabadi team ko IPL Champion bana chuke hain.