Hyderabad: Shehar Hyderabad ke mashhoor Osmania hospital ki qadeem imarat ko khaali karne ka amal taizi ke sath jari hai. Is imarat ko jummay tak khaali kardiya jaye ga. Ta haal kayi chambers, Dafatir ko is imarat se khaali kardiya gaya. Ye imarat khasta haali ka shikaar hogayi hai. Samjha jata hai ke hukoomat nay is imarat ko munhadim karne ka faisla karliya hai. Hukoomat chahti hai ke is imarat ki jagah 2 judwaa Towers ki taamer amal mein layi jaye. Is imarat ke mojooda mareezoun ko Quli Qutub Shah building muntaqil kiya gaya hai.
Is imarat ka maamla is waqt manzar aam par aaya jab haal hi mein is ki qadeem imarat mein Sewerage ka pani aur barish ka pani daakhil hogaya jis ki wajah se mareezoun aur un ke rishta daaroun ko kaafi mushkilaat ka saamna karna pada. Baad azan un mareezoun ko imarat ki pehli manzil par muntaqil kiya gaya tha. Is block mein pani ki wajah se mushkilaat ka saamna hai. Isi douran Osmania medical staff ney is qadeem imarat ko munhadim karne aur is ki jagah nai imarat ki taamer ka mutalba kiya hai.