Hyderabad: IPL hindustani cricket shaiqeen ka pasandeeda tournament hai aur is tournament mein shirkat karne walay apne pasandeeda cricketer ko dekhnay ke liye har shehar mein awam ka hujhoom umadd parta hai aur jab apne kisi pasandeeda khiladi ki ek jhalak dekhnay ka mauqa milta hai to phir cricket shaiqeen usay ganwana nahi chahtay hain .
Aisa hi aaj Hyderabad mein mahol dekha gaya jab IPL mein kamyaab honay wali team ko di janay wali trophy ke deedar aur is ke sath tasaveer utaarnay ka mauqa awam ko diya gaya tha. IPL 2019 ki trophy Hindustan bhar mein apna safar mukammal kar rahi hai aur aur aaj jab Hyderabad ke GVK Mall mein trophy ko awam ke liye rakha gaya to yahan cricket shaiqeen ki ek badi tadaad mojood thi. kayi noujawan cricket shaiqeen ne trophy ke sath Selfie bhi banai. aam cricket shaiqeen ke alawa star sports Telugu anchor Neha Choudhry ne bhi IPL trophy ke sath apni selfie banai .
Yaad rahay IPL trophy ka safar 17 March ko New Dehli mein shuru hua aur woh Hindustan ke ahem shehron mein apna safar mukammal kar rahi hai. 5 April ko chandi garh aur saat April ko Jaipur is ki agli manzil hogi .- YTB STAFF