Hyderabad: Greater Hyderabad ke pooray ilaqay mein shadeed barish se keechad ka pani gharon mein daakhil honay ke baad, Greater Hyderabad Municipal Corporation ( GHMC ) ne mangal ki shaam se 7,750 se ziyada afraad ko mehfooz maqamat par muntaqil kardiya. Hyderabad ke kayi ilaqon mein barish ka pani gharon mein daakhil honay ke sath GHMC ne rahaishion ko qareebi function Halls, Community Halls aur deegar maqamat par muntaqil kar rahay hain. Yeh iqdaam shehri taraqqi ke wazeer KT Rama Rao ne Municipal Corporation ko baghair kisi takheer ke bachao aur imdadi iqdamaat karne ki hidaayat ki hai.
GHMC ke 6 zones mein, Sab se ziyada mutasirah LB Nagar hain. LB Nagar zone mein Ramanthapur jheel, Pedda Cheruvu, Chinna Cheruvu, Bathula Cheruvu aur Saroornagar jheel se pani beh raha hai. Un aabi zakhair ke aas paas ke rahaishion ko Chilakanagar Adarshnagar Community Hall, Erragunta Community hall aur PJR function hall mein muntaqil kiya ja raha tha.
Hyderabad ka Purana shehar bi barish se shadeed mutasir raha khususan Charminar zone mein, Palle Cheruvu aur APPA Cheruvu buri terhan mutasir hue jis ke nateejay mein Alinagar, Suban Colony mein doob gaya jabkay hawai adday jane wali traffic bhi mutasir hui. Un ilaqon ke rahaishion ko Siddha function hall aur OSD function hall muntaqil kardiya gaya.
Greater Hyderabad Municipal Corporation ( GHMC ) ke ohdedar shehar mein barish ke pesh-e-nazar chokas hue hain. Kayi khasta haal aur maskhdoosh imaarton ko munhadim karne ka kaam kiya jaraha hai. Ameerpet, Balapur ki kayi Colonies ki sadkon par pani jama hogaya hai jis se rahgiron ko mushkilaat ka saamna karna padh raha hai. Abids aur Nampally ke ilaqon mein traffic Jam dekhi gayi. GHMC ne EVDM DRF teams ko tainaat karte hue imdadi iqdamaat taiz kardiye jabkay hindustani fouj ki teamon ne bhi Falaknuma Bandlaguda aur deegar maqamat par imdadi kaam shuru kiye.