Hyderabad : Hyderabad cricket association ( HCA ) ke nou muntakhib sadar Mohammad Azharuddin ne aaj TRS ke karguzar sadar wo IT wazeer KT Rama Rao se mulaqaat ki. Baad azan unhon ne media numaindoun se baat karte hue kaha ke ”Unhoun ne HCA ke sadar muntakhib honay ke baad wazeer IT se mulaqaat ki. aur cricket ki taraqqi ke liye wazeer aur reyasti hukoomat se taawun ki koshish ki.Azharuddin ne yeh bhi kaha ke unhon ne cricket association ki nai team ko wazeer se muta-arif karaya hai.
Unhon ne kaha ”ab mein reyasti hukoomat se taawun le kar cricket ki taraqqi par tavajja dunga“. unhon ne mazeed kaha ke woh jald hi wazeer-e-aala KCR se mulaqaat karenge aur unka taawun haasil karenge. Azharuddin ne kaha ke woh riyasat mein cricket ki taraqqi ke liye dosray rehnumao se bhi mulaqaat karenge.
Azharuddin ke hamrah HCA ke paanch deegar ohdedar bhi they, jo jummay ke intikhabaat mein un ke panel se muntakhib hue they. HCA ke sadar muntakhib honay ke baad, Azharuddin un par lagey match fixing ke ilzaam ke baad cricket khelnay par aaed pabandi ke taqreeban do dahaiyo ke baad cricket ke shoba mein ek nai inning ka aaghaz kar rahay hain.
Agar chay ke Andhra Pradesh high court ne 2012 mein un par aaed pabandi khatam kardi thi, lekin inhen bator-e-khiladi khel mein wapsi ke liye bohat der hochuki thi. Azharuddin ne 2009 ke intikhabaat ke mauqa par congress party mein shamoliat ikhtiyar ki thi aur woh Uttar pradesh ke Muradabad lok sabha halqa se rukan-e-parliament muntakhib hue the, taham woh Rajasthan ke Tonksoi Madhapur se 2014 mein intikhabaat haar gaye they. –YTN STAFF