Hyderabad : Hyderabad Central University ki Taliba research scholar Deepika maha patra, peer ki subah university campus ke hostel ke baath room mein murda payi gayi thi. bemari ki wajah se iski mout waqay honay ka andesha zahir kiya ja raha tha.
Mangal ko police ki janib se bhi yeh wazeh kar diya gaya ke mazkoorah Taliba ki mout ke talluq se koyi shubhat nahi hain. ibtidayi tehqiqaat se pata chala hai ke iski ”Neurological disorder“ se mout hui hai. is ke ghar walon ki janib se bhi kisi qisam ka shuba ka izhaar nahi kiya gaya hai.
29 sala Taliba deepika , Khargapur, maghribi bangal ki rehne wali thi, aur university mein Phd kar rahi thi. aur campus ke hostel mein reh rahi thi.
University health center mein dastyab tibbi record aur deepika ke rishta daaroun ki janib se di gayeen maloomat ke mutabiq woh neuro se mutaliqa bemari aur mirgi se mutasir thi, aur uski adwiyaat istemaal karti thi.
Police ke mutabiq deepika university camps ke hostel ke baath room mein be hoshi ki haalat mein mili thi. doosri ladkiyon nay dekha aur university ke hukkaam ko ittila di. unhoun nay usay qareeb ke hospital le gaye, jahan doctoron nay usay murda qarar diya. baad azan lash ko usmaniya hospital ke murda khanah mein muntaqil kya gaya. –YTN STAFF