Abu Dhabi: Delhi Capitals aur Sunrisers Hyderabad mein etwaar ko honay walay dosray Qualifier se IPL Final ki doosri team ka faisla hoga jo 10 November ku khitabi muqablay mein difai Champion Mumbai Indians se muqaabla kere gi. 19 September ko Mutahidda Arab Emarat mein shuru honay wala IPL 2020 ab apne aakhri 2 muqablon mein baqi reh gaya hai. 4 martaba ki Champion Mumbai pehlay qualifier mein Delhi ko aasani se shikast dainay ke baad final mein pahonch gayi thi jabkay Hyderabad ne guzashta roz Eliminator mein Royal Challengers Bangalore ku 6 wickets se shikast di. Delhi pehli martaba Final mein jagah bananay ki koshish kar rahi hai to dosri janib Hyderabad ki team teesri martaba Final mein pounchanay ka liye poora zor lagaye gi. Hyderabad ne saal 2016 mein final mein pahonch kar khitaab apne naam kiya tha, Jabkay 2018 mein usay Chennai Super Kings se shikast ke baad kar Runner up par ektafa karna pada tha. Hyderabad ki aakhri 4 matches mein karkardagi ne usay Delhi ke khilaaf jeet ka mazboot dawaydaar banaya hai. Hyderabad ki team Mumbai aur Delhi ke baad Table mein teesray maqam par thi.
Hyderabad ne pichlle 3 League Matches mein Playoff mein deegar 3 teams ko shikast di thi. Playoff se qabal Hyderabad ne Delhi Capital ko 88 runs, Bangalore ku 5 wicket se aur Mumbai Indians 10 wickets se shikast di aur phir Eliminator mein Bangalore ku 6 wickets se hara di. Bangaloru ke khilaaf 132 runs ke hadaf ke taqub mein Hyderabad ki team ek aisay bhanwar mein phas gayi thi jab is ki 4 wickets 67 runs par girgayi theen lekin tajurbahkaar Kane Williamson ne not out 50 runs aur All Rounder Jason Holdar not out 24 runs ke sath panchwin wicket ke liye 65 runs jood kar team ko 2 gainde baqi rehtay hue jeet se humkenar kiya.
Hyderabad ne Bangalore ko 20 overs mein 7 wicket par 131 ke score par roka aur phir 19.4 overs mein 4 wicket par 132 runs banakar dilchasp jeet haasil ki. Williamson apni match jeetnay wali Inning ke liye player of the match banay. Hyderabad ki batting captain Warner, Manish Panday aur Williamson par ziyada munhasir hai agar wicket keeper Wriddhiman Saha fit ho jatay hain to woh wapsi karen ge aur Shreevats Goswami ko baher jana pade ga.