Bunyadi sahuliyaat se mehroom taleemi idaara fouri tavajja ka mutaqazi
Hyderabad: Puranay shehar ki talibat ke liye waisay hi qareebi ilaaqoun mein sarkari taleemi idaron ka fuqdaan hai aisay mein Hussaini Alam mein mojood talibat ka mashhoor Government Junior College bunyadi sahuliyaat se mehroom hai aur agar is par fouran tavajja dete hue is ke masail ko hal nahi kiya gaya to shayad yeh bhi tareekh ka hissa banjayega.
Hussaini Alam ka government degree college woh wahid imarat hai jo ke qareebi ilaaqon ki ladkiyon ke liye school taleem se leker aala taleem ka ek ahem markaz hai lekin ek hi imarat mein guzashta kayi barson se paanch taleemi marakaz apni khidmaat anjaam day rahay hain jis mein do Colleges joke degree aur junior colleges hain jabkay teen sections mein schools apni tadrisi sahuliyaat faraham kar rahay hain, jo kay pre-primaray, primaray aur high school hai.
Ek hi chhat taley pehlay hi paanch taleemi idaray apni khidmaat anjaam day rahay hain lekin un tamam mein junior college ki haalat intehai ab-tar hai kyunkay ek janib is college mein taqreeban 1600 ladkiyan atraaf ke ilaaqon se taleem haasil karne ke liye aati hain to doosri jaanib is college mein bunyadi sahuliyaat jaisay ke barqi sarbarahi, fan aur lights ka class room mein fuqdaan hai. is ke alawa toilets khasta haalat aur canteen ki Adam mojoodgi bhi talibat ke liye mazeed masail paeda kar rahi hai jabkay imarat ki haalat bhi behtar nahi hai.
Yeh college halaanke kayi baras qabal qaim kiya gaya hai lekin reyasti hukoomat is ki janib tavajja nahi day rahi hai aur yeh khasta haal imarat mein tabdeel horahee hai jahan kamrah jamaat ke liye imarat sahih nah honay ke baad fan, benches aur kursiya moujood nahi hain jabkay kayi barson se is ki aahak pashi bhi nahi hui hai jis ki wajah se electric switch board tooti hui haalat mein honay ke alawa Toilets haalat bhi na qabil bayan hai.
Kamrah jamaat ki khasta haal honay ki wajah se talibat compound mein mojood chhote se garden mein baith kar taleem haasil karne ko tarjeeh day rahi hain. is zimn mein muqami afraad ne kaha hai ke atraaf ke ilaqa mein yeh wahid government junior college hai lekin is ki jo haalat hai is se andaza hota hai ke reyasti hukoomat aur arbab mijaz ki janib se taleem ke muamlay mein jo daaway kiye jatay hain woh kitney khokhle hain.
Awam ne mutalba kiya hai ke reyasti hukoomat, muqami numainday aur shoba taleem ke arbab majaz is taraf fori tavajja dete hue puranay shehar ki ladkiyon ke liye mojood is taleemi idaara ko behtar haalat mein layein taakay hyderabadi shehrion ke taleemi aitebaar se mustaqbil ko behtar banaya jasakay. -YTNSTAFF