Mount Maunganui: Hindustani Cricket Team ke Top Order se behtar muzahira ki umeed ki jarahi hai taakay wo kal yahan New Zealand ke khilaaf khailay jaane walay rawan series ke teesray aur aakhri One Day muqaabla mein kamyabi haasil karte hue 3-0 ki sharamnaak shikast se mehfooz reh saken. Mustaqil Captain Kane Williamson ki adam mojoodgi ke bawajood New Zealand ki team ne ibtidayi 2 muqabloun mein kamyabi haasil karte hue twenty 20 series ki shikast ka azaala kiya hai. Aakhri muqaabla ke liye mustaqil Captain Williamson Fitness Test kamyaab karne ke baad team mein wapsi ke liye tayyar hain.
Dono teamoun ke darmain kamyabi ka asal farq Top order ke muzahirey rahay hain. Hindustan ke liye Rohit Sharma, Shekhar Dhawan ke zakhmi honay ke baad team se bahar honay aur K.L Rahul ko medal order mein khilanay ki wajah se nai jodi Prithvi Shaw aur Mayank Agarwal ko Inning ke aaghaz ka mauqa diya gaya hai. Taham dono hi Openers ibtidayi muqabloun mein badi Inning khailnay mein kamyaab nahi hosakay hain. Guzashta 12 mah ke douran khailay gaye One Day muqabloun mein Rohit Sharma ne 57.30 ki osat se runs banaye they jo Hindustan ki fatohat mein kaleedi rule raha hai.
Hindustani team yahan twenty 20 series mein 4-0 se kamyabi haasil karne ke baad aakhri muqaabla ke liye pohanchi thi aur yahan bhi kamyabi haasil karte hue is ne series ko 5-0 kardiya tha lekin is martaba halaat mukhtalif hain jahan hindustani team One Day mein nakami ke baad ab khud ko 3-0 ki sharamnaak shikast se mehfooz rakhnay ke liye koshan hain. Hindustan jis ne 2014 mai khelii gayi One Day series mein New Zealand ki sarzamen par 4-1 ki shikast bardasht ki thi. New Zealand ne Spinner Ish Sodhi aur fast bowler Blair Tickner ko team mein shaamil kiya.
Williamson ki wapsi, Sodhi aur fast bowler Blair shaamil
Hindustan ke khilaaf 11 Feb ko yahan khailay jaanay walay teesray aur aakhri One Day muqaabla mein New Zealand team ke khaima mein khushkhabri ye hia ke is ke captain Kane Williamson fitness test kamyaab karne ke baad wapsi kar chukay hain. Alawa azeen team mein Spinner Ish Sodhi ke alawa fast bowler Blair Tickner ko shaamil kiya gaya hai. New Zealand team jis ne pehlay hi ibtidayi 2 muqabloun mein kamyabi haasil karte hue series par 2-0 ki na qabil taskheer sabqat haasil karli hai aur ab aakhri muqaabla mein bhi kamyabi ke liye team ne bowling shoba ko mazboot karne ke liye Ish Sodhi aur Tickner ko shaamil kiya hai.
Ye dono hi khiladi Hindustan A ke khilaaf khailay gaye ghair sarkari test muqaabla mein maizban team ka hissa they. New Zealand team ke liye mutadid khiladioun ka zakhmi hona masail ka shikaar hai kyunkay is ke fast bowler Tim Southee aur Mitchell Santner peet ki takleef ke baais jabkay Scott Kuggeleijn bukhaar se mutasir hain. Hindustani team jisay ibtidayi 2 muqabloun mein shikast ke baad series ganwana pada hai ab wo kal yahan khailay jaanay walay muqaabla mein kamyabi ke zareya 3-0 ki shikast se un ko mehfooz rakhnay ki koshish kere gi. Hindustan ki liye Shreyas Iyer ka shandaar faam misbet pehlu hai to doosri janib is ke saf awwal ke bowler Jasprit Bumrah ka wickten nah lainay ka silsila tashweesh ka baais hai. –YTN STAFF