New Delhi: Hindustani team ke sabiq Opener Gautam Gambhir ka khayaal hai ke ICC Tournament ke baday Matches mein hindustani team ko dabao ka saamna karne mein sakht mushkilaat ka saamna karna padta hai aur isi wajah se is ne bohat se faisla kun match hare hain. Star sports Cricket Connected Show mein baday Tournament mein hindustani khiladioun ke dabao ka saamna karne par Gambhir ne kaha ke ek achay khiladi aur ek bohat achay khiladi mein ye farq hota hai ke wo aap ko faisla kun Matches mein apni zimma daarana karkardagi se match jeta sakta hai. Meri nazar mein hindustani team un matches mein dabao ke muqaabla karne ke qabil nahi hai jabkay doosri temen bhi ye kaam karti hain
Unhoun ne kaha ke agar aap Simi final aur final ki karkardagi ko dekhen to aap dekhen ge ke team league ki satah mein umdah karkardagi ka muzahira karti hai lekin jaisay hi Simi Final aur Knockout Matches atay hain to team ki karkardagi mayoos kun hojati hai. Is ki wajah kamzor zehniat hai. Sabiq cricketer ne kaha ke hum hamesha kehte hain ke hamaray paas sab kuch hai. hamaray paas aalmi Champion ban’nay ki salahiyat hai lekin aap ko aalmi champion nahi kaha ja sakta jab tak ke aap usay cricket ke maidan par saabit nahi karte hain.
Gambhir ne kaha ke aisi haalat mein aap ko apni qabliyat dikhani hogi. Mein hamesha kehta hon ke do tarfah series aur league ki satah mein aap ko ghalatiyan karne ke mawaqay melitay hain lekin Knockout mein aap ghalti nahi kar saktay hain. Agar aap ney ghalti ki hai to aap ko seedhay ghar jana pade ga. Is jagah par aetmaad ki zaroorat hai jo faisla kun matches mein hindustani team ke paas nahi hai. Qabil zikar hai ke hindustani team aksar Knockout matches mein ghouta kha jati hai. Hindustani team 2016 mein T20 world cup ke Simi final mein West Indies ke hathoun, 2017 mein Champions trophy ke final mein Pakistan aur guzashtah saal munaqidah ICC One Day world cup ke Simi final mein New Zealand se har gai thi. Un tamam Tournament ke league matches mein hindustani team ne shandaar khail ka muzahira kiya tha.