New Delhi: Hindustan mein jaan lewa aalmi waba corona virus se sehat yab honay walon ki tadaad mein izafah se mareezon mein guzashta pandrah dinon se giravat ka silsila jari hai aur yeh tadaad 8 lakh se neechay aagai hai jo kay awam ke liye ek khush aaind khabar hai. Taqreeban ek mah qabal 10 lakh se ziyada fa-aal mareez thay, Tab se is mein giravat ka silsila jari hai aur ab majmoi mareezon ke muqaabla fa-aal mareez 100 se 70 feesad reh gaye hain. Isi ke sath hi jaan lewa aur mohlik tareen corona ko shikast dainay walon ki sharah 88 feesad tak pahonch gayi hai.
Markazi wizarat sehat-o-khandani behbood ki taraf se haftay ke roz jari taaza tareen adaad-o-shomaar ke mutabiq guzashta 24 ghanton ke douran 70,806 corona mutasireen sehat yab hue jis se Hindustan mein sehat yab honay walon ki majmoi tadaad 65.24 lakh se zayed hochuki hai. Naye mareezon mein kami ki wajah se fa-aal mareez 9.441 se ghatt kar 7.95 lakh ho chukay hain. Isi arsay ke douran 62,212 naye mamlaat report hue jis se mulk mein corona mutasireen ki majmoi tadaad badh kar 74.32 lakh hogayi, Jabkay mazeed 837 mareezon ki halakat ke sath hi jaan lewa waba se marnay walon ki tadaad 1.13 lakh se mutawajja kar chuki hai. Mulk mein corona virus se amwaat ki sharah ab 1.52 feesad hai.
Mulk ki janoobi riyasat Karnataka mein guzashta 24 ghanton mein corona ke 1111 mareez kam hue jis se fa-aal mareezon ki tadaad 1.12 lakh hogayi. Riyasat mein amwaat ki tadaad 10,356 tak pahonch chuki hai jabkay ab tak 6.28 lakh mareez sehatyab ho chukay hain. Andhra Pradesh mein isi arsa mein corona mareezon ki tadaad 1068 se kam hokar 979 reh gayi jabkay riyasat mein ab tak 6382 afraad halaak ho chukay hain. Wahein 7.30 lakh se zayed corona mareez sehatyab hue hain.
Abadi ke lehaaz se Hindustan ki sab se badi riyasat Uttar Pradesh mein isi arsay ke douran corona ke 1032 mareez kam hue jis se mareezon ki majmoi 35,263 reh gayi jabkay jaan lewa waba se 6589 halaak aur 4.08 lakh se zayed sehat yab hue hain. Tamil Nado mein fa-aal mareezon ki tadaad 40,959 hai aur 10,529 afraad halaak ho chukay hain. Riyasat mein 6.27 lakh sehatyab hue hain.