Dubai: Hindustani Cricket Team ICC Test Championship Mess aur aik million Amrici dollar inaami raqam mutawatar teesri martaba haasil karliya hai jaissa ke usay Australia ki sarzamen par pehli martaba Test Series mein kamyabi bhi haasil huwi hai.
Hindustani Cricket Team ke Captain Virat Kholi ney is ziman mein izharkhayal karte huwe kaha ke ICC ki test darja bandi ney mutawatar teesri martaba aizaz aur inaam haasil karna team ke liye yaqeenan aik faqriya lamha hai.
Hamari team tamam tar tarz ki Cricket mein behtareen muzahira kar rahi hai aur umeed hai ke aindah season mein bhi yeh muzahiray barqarar rahen ge. Hum yeh bhi achi terha jantay hain ke Test Cricket ki ahmiyat kya hai aur hum is tarz ki cricket ke liye behtar karna chahtay hain.
Hindustani Cricket Team ka sare fehrist maqam ke sath season ka ekhtataam karna ghair mutawaqqa nahi hai kyunkay rawan season is ney bhi guzashta aik saal ke douran behtareen muzahiray kiye hain.
Dosray maqam par New Zealand ki Team rahi jin ki qayadat Kane Williamson kar rahay hain jo husn ittafaq se test cricket mein bhi Virat Kohli ke baad dosray behtareen batsman hain. New Zealand ko 50 hazaar Amrici dollar inaami raqam mili hai. ilawa azeen guzashta do barson se darja bandi mein dosray maqam par season ka ekhtataam karne wali South Africa ko is martaba teesray maqam par iktefa karna pada aur usay 20 hazaar Amrici dollar inaami raqam mili hai.
New Zealand ke Captain Kane Williamson ney kaha ke test ki aalmi darja bandi mein New Zealand ko saal mein dosra maqam haasil karna aik ghair maa’mooli aizaz hai aur mujhe khusi hai ke team ney is meyaad ke douran isteqlal ke sath muzahiray kiye hain.