Rajkot: Hindustani cricket team ko kal yahan Australia ke khilaaf khailay jaane walay dosray muqaabla mein karo ya maru sorat e haal ka saamna hai aur usay series mein baqi rehne ke liye kamyabi ashad zurori hai to doosri janib Australia team ki nazrain series mein kamyabi par markooz hain jaissa ke is ne Mumbai mein munaqidah series ke pehlay muqaabla mein 10 wicketoun ki kamyabi haasil karte hue 3 muqabloun ki rawan series mein 1-0 ki sabqat haasil karli hai.
Kal yahan khailay jaane walay dosray muqaabla mein Virat Kohli ki apne riwayati maqam teesray number par khailnay ke imkanaat roshan hain kyunkay pehlay muqaabla mein tenun Openers Rohit Sharma, Shikhar Dhawan aur K.L Rahul ko team mein shaamil karte hue Kohli ka number 4 par batting karne ka faisla nakaam huva hai. Kohli ke dobarah number 3 par batting karne ke faisla ke baad phir ek martaba number 4 par batting karne ka mauzo behas mein aachuka hai jabkay opener Shikhar Dhawan ne pehlay hi kaha hai ke wo intizamia agar chahta hai to number 3 par batting ke liye tayyar hain.
Kohli ka number 3 par batting karna medal order mein mazeed dehshat peda karta hai jis ke zareya K.L Rahul ko number 4 par bhi batting ke liye rawana kiya ja sakta hai. Rohit aur Dhawan ne Mumbai Oneday mein Inning ka aaghaz karte hue team ko behtar shuru faraham nahi ki thi halaank Dhawan ne 91 gaindoun mein 74 runs ki Inning khelii jabkay Rahul ne bhi un ka behtar sath diya tha. Rishabh Pant zakhmi hokar dosray Oneday se bahar ho chukay hain lehaza un ke maqam par K.L Rahul se Keeping karwai ja sakti hai
Bowling shoba mein Jasprit Bumrah ki wapsi zaroor hui hai lekin wo apna faam haasil karne mein hanooz nakaam hain jaissa ke guzashta muqaabla mein wo bowling ka aaghaz karte hue team ko behtar shuruvaat faraham nahi karpaye jis ka deegar bowleroun par bhi assar huva aur tamam bowler hi wicket lainay mein nakaam rahay aur Australia ne ek aasaan kamyabi darj ki.
Doosri janib Australia team jis ne pehlay Oneday mein khail ke tamam shobo mein ghayr-maa’mooli muzahira kiya wo un muzahiroun ke silsila mein barqarar rakhtay hue dosray oneday aur series mein kamyabi ke liye koshan hogi. Fast bowleroun ne Mitchell Starc, Pat Cummins aur Kane Richardson ke humrah Spinners ki jodi Adam Zampa aur Ashton Turner ne behtareen bowling ka muzahira kiya. Hindustani team kal khailay jany walay muqaabla mein Openers ki jodi David Warner aur Aaron Finch ko jald out karte hue maheman team ke medal order par dabao banana mein kamyaab hoti hai to muqaabla par is ki girift mazboot honay ka imkaan hai. Rajkot ki wicket batting ke liye sazgaar rahay gi. –YTN STAFF