Bangloru: Hindustan aur Australia ke darmain rawan Oneday series ka teesra aur faisla kun muqaabla kal yahan Banglore mein khela jaye ga aur dono hi temen kamyabi ke liye pur azm hain. Mumbai mein munaqidah pehlay muqablay mein jahan Australia team ne Hindustan ko khail ke tamam shobo mein be bas karte hue 10 wicketoun ki kamyabi haasil ki thi, Wahein guzashta muqablay mein hindustani team ne behtar batting muzahira ki badolat kamyabi ke zareya series ko 1-1 se barabar kiya hai.
Hindustan ke liye sab se behtar nateeja dosray Oneday mein batting ki saf bandi rahi kyunkay Rohit Sharma, Shikhar Dhawan aur K.L Rahul ko team mein khilanay ke bawajood batting order ka faisla kamyaab huva jaissa K. Rahul ne number 5 par batting karte hue barq-e raftaar nisf century score ki jis ki badolat hindustani team ko kamyabi haasil karne mein sahoolat hui. Alawa azeen mustaqil wicket keeper Rishabh Pant ki ghiar mojodgi mein Rahul ne Keeping ki zimma daari bhi nibhai hai.
Ba-hasiat opener khailnay walay Rahul ne 150 se zayed ke Strike Rate se apne liye ghir marof maqam par batting karte hue hindustani batting shoba mein mazeed geherai peda ki hai. Hindustan ke liye bowling shoba mein duniya ke number ek bowler Jasprit Bumrah ka naaqis form tashweesh ka baais hai. Doosri janib Australia team ke fast bowler Mitchel Strac guzashta muqablay mein mehengay aur nakaam hue they, Wo apni is nakami ko faisla kun muqablay mein behtar karne ki koshish karen ge neez maheman team ka middle order par bhi dabao rahe ga. –YTN STAFF