Hyderabad: Hindustan aur West Indies ke darmain 3 twenty 20 muqabloun ki series ka pehla muqaabla kal yahan Hyderabad ke Rajiv Gandhi International stadium mein khela jaye ga aur is muqaabla mein hindustani opener KL Rahul aurRishabh Pant par tamam tar tavajja markooz hogi. Hindustani Team world cup ki tayari ke liye is series ko ahmiyat ki haamil qarar day rahi hai kyun kay Australia ne aindah baras twenty 20 world khela jaye ga jis mein West Indies apne khitaab ka difaa kere gi. Zakhmi opener Shikhar Dhawan ki adam mojoodgi mein K L Rahul ko ye series ahmiyat ki haamil hochuki hai kyun kay wo Aalmi champion West Indies ke khilaaf apne muzahirey dikhata hue Team mein mustaqil maqam haasil kar saktay hain.
Rahul jinhoun ne bain-ul-aqwami twenty 20 muqabloun mein 42.74 ki osat se 31 muqabloun mein 974 Runs score kiye hain. Rahul ke ilawa ek aur infiradi tavajja ke markaz khilari Rishabh Pant hai jin ki salahiyatoun ki bunyaad par inhen Team mein shaamil kiya gaya hai lekin haliya dinoun mein wo apne miyaar ke mutabiq muzahirey nahi kar paye hain jis ki wajah se unpar shadeed tanqeed bhi ki jarahi hai. Ilawa azeen team ne Sanju Samson ko shaamil kiye jane ke baad Pant par behtar muzahira ke liye aur Team mein apne maqam ko barqarar rakhnay ke liye mazeed dabao bad chuka hai. Doosri janib West Indies ki qayadat Hindustan mein pehli martaba tajurbahkar All Rounder Kieron Pollard kar rahay hain halaank un ki qayadat mein Lacknow mai Afghanistan ke khilaaf munaqidah 3 muqabloun ki twenty 20 series mein maheman team ko 2-1 ki shikast bardasht karni padi hai. West Indies mein hit mair aur pooran ke ilawa tajurbahkar kheladi shaiqeen ki tavajja ka markaz honge jo ke apni teez raftaar batting ke liye mashhoor hain.
Hindustani cricket Team ke captain Virat kohli ne kal yahan West Indies ke khilaaf khailay janay walay muqaabla se qabal media numaindoun se ezharkhyal karte hue kaha ke aindah baras Australia mein munaqqid Sedney twenty 20 world cup ke liye hindustani fast bowling shoba mein ek bowler ke liye maqam mojood hai kyun kay Bhuvneshwar Kumar Jasprit Bumrah aur Mohammad Shamee yakeeni tor par apni jagah Team mein paki karwa chuke hain.
Kohli yahan Hyderabad ke Rajiv Gandhi International stadium mein press conference se khitaab kar rahay they. kohli ne kaha ke world cup ke liye Team ki jo tayari chal rahi hai is munasbat se khiladioun mein behtar musabqat mojood hai aur fast bowling shoba mein ek bowler ke liye hanoz mauqa hai. Kohli ne mazeed kaha ke hamaray liye ye wazeh hochuka hai ke fast bowling shoba mein kumar, Bumrah aur Shamee ka maqam yakeeni dikhayi day raha hai jabkay Deepak Chahar ne haliya dinoun mein behtareen muzahira kiya hai.
Mohammad Shamee ke mutaliq kohli ne kaha ke haliya dinoun mein Shamee ke muzahiray intahi shandaar rahay aur Australia wicketoun par Shamee ki salahiyatoun se kaafi faida uthaya ja sakta hai. Neez un ka tajurbah aur khaas kar un ke Yogers se ikhtitami Overs mein runs ko roknay mein madad mil sakti hai. Neez Bangladesh ke khilaaf kheli gayi series mein chahar ke muzahiroun ne kaafi mutasir kiya hai aur umeed hai ke wo is ka silsila jari rakhen ge. –YTN STAFF