Dubai : ICC ne world cup ke digital adaad wo shumaar jari kiye hain jis mein kaha gaya hai ke digital alaat ke zareya jin cricket shaiqeen ne world cup ka mushahida kiya, unki tadaad 3.5 billion hai. world cup ki maqboliat social media ki web sites par bhi urooj par rahi jaissa ke twitter aur Instagram ke sarfeen ki tadaad 2.3 billion fee minute rahi. isi tarhan Facebook ke sarfeen ki tadaad 1.2 billion record ki gayi hai.
ICC ke chief executive ne izhaar-e-khayaal karte hue kaha ke online shaiqeen ki is tadaad ne wazeh kardiya hai ke duniya bhar mein cricket ki maqboliat mein izafah ho raha hai. ICC ki tamam tar tavajja isi nuqta par hai ke cricket se aalmi shaiqeen ke rabta ko mazboot se mazboot banaya jaye. twitter par kayi ek hashtag bhi world cup ke douran dekhnay ko miley.
Hindustan aur Pakistan ke Darmiyan old Trafford mein khela gaya muqaabla awam ki janib se sab se pasandeeda muqaabla tha kyunkay is muqablay ke douran 2.9 million shaiqeen ne tweets kiye jis ki badolat twitter par ab tak ka yeh sab se bada ODI muqaabla saabit hua. iske baad dusray muqam par England aur Newzealand ke Darmiyan munaqidah final muqaabla raha jabkay Newzealand aur Hindustan ke Darmiyan munaqidah Semi final ko teesra muqam haasil hua.
Social media par ICC world cup ke liye event ke douran 14 million naye followers banay hain jabkay ICC ke soshil media channel par 481 million afraad kisi nah kisi mauzo se judey rahay. ICC ki Website par 75 million sarfeen ki moujoodgi ka record hai jabkay ICC ke app ko 272 million martaba istemaal kiya gaya hai. –YTN STAFF