New Dehli: Coronavirus ki wajah se Hindustan aur janoobi Africa ke darmain 3 muqabloun ki One Day Series ko mansookh kardiya gaya hai ab usay baad mein khela ja raha jaye ga. Neez rawan mah khailay janey walay dolatmand Tournament IPL par bhi is ka assar hochuka hai jaissa ke Hindustan mein Coronavirus ke badhatay mamlaat aur awaami sahet ke liye honay walay khadshaat ke pesh e nazar IPL 2020 ku 2 haftoun ke liye moattal kardiya gaya hai. IPL ke rawan Season ka pehla muqaabla 29 March ko munaqqid hune wala tha lekin BCCI mein Tournament ke Franchisee aur deegar ahem ohdedaroun se mushawarat karne ke baad usay 2 haftoun ke liye multawi kardiya gaya hai.
BCCI se jari kardah bayan ke mutabiq hukoomat Hind ki janib se jari kardah rehnumaiyana qawaid ke baad BCCI ke sadar Sourav Ganguly, Board Secretary Jay Shah aur IPL ke senior ohdedaroun ne is Tournament ko multawi karne ka faisla kiya hai. Hukoomat ne pehlay hi Coronavirus ko Hindustan mein phelnay se roknay ke liye jo ahteyati iqdamaat kiye hain jis ke tehat guzashta roz hi 15 April tak sabhi tarz ke visa moattal kardiye they.
IPL ke mutaliq Sourav Ganguly ne pehlay kaha tha ke Tournament ko muqarara waqt par munaqqid karne ke liye tamam tarz ke iqdamaat karliye gaye hain lekin guzashta haftay Hindustan mein Coronavirus ke pehlay mamlaat dar-ul-hukoomat Delhi aur janoobi riyasat Telangana mein samnay aeye aur dekhte hi dekhte 2 haftoun ke douran mulk bhar mein is mohlik Virus se mutasir honay walay afraad ki tadaad 75 ke qareeb poanch chuki hai. Alawa azeen Delhi hukoomat ne elaan kardiya hai ke wo riyasat mein IPL ke muqabloun ke alawa deegar kayi ahem muqabloun aur awaami ijitemaat par pabandi ayed kardi hai. –YTN STAFF