BJP ko Asaduddin Owaisi ka challenge
Hyderabad: Telangana BJP ke sadar ke yahan puranay shehar ke ilaqay mein Surgical strike karne ke ishtial bayan baazi par par shadeed radd-e-amal ka izhaar karte hue, AIMIM ke sarbarah Asaduddin Owaisi ne kaha ke Bandi sanjay aur unki party mein himmat hai to woh China par yeh karwai karkay dekhaye jahan China ne hindustani ilaqa par qabza kiya hai.
Hyderabad ke rukan-e-parliament ne ye jaanna chaha ke China ke khilaaf koi Surgical strike kyun nahi kiya jaraha hai jis ne 920 murabba kilometer hindustani ilaqay par qabza kiya hai. sunjay ke Surgical strike tabsarah ki mazammat karte hue, unhon ne haerat ka izhaar kiya ke ek siyasi jamaat sirf ek intikhab ke liye aisi zabaan bol sakti hai.
woh keh rahay hain ke woh Pakistanio ko bhaganay ke liye puranay shehar mein Surgical strike karenge. puranay shehar mein kitney Pakistani hain? Owaisi ne ek intikhabi ijlaas mein BJP qaideen se yeh sawal kiya aur kaha ke mein unko challenge kar raha hon ke kam az kam 100 Pakistanio ko yahan rehtay hue dikhaye.
Unhon ne ye bhi kaha ke agar Pakistani puranay shehar mein reh rahay hain to Wazeer-e-Azam Narendra modi ko pehlay wazeer mumlikat braay dakhla G.kishan reddy ko hatana chahiye. unki kabeena se jab yeh unki naak ke neechay horaha tha. wo yeh bhi jaana chahtay hain ke agar woh puranay shehar mein muqeem hain to markaz ki BJP hukoomat saarhay chay saal se kiya kar rahi hai. usay hyderabad ki tauheen qarar dete hue Owaisi ne logon se kaha ke 1st decemeber ko honay walay greater hyderabad municipal coporation ( GHMC ) intikhabaat mein BJP ko mozoon jawab den. Unhon ne ilzaam lagaya ke BJP hyderabad mein 1980 aur 1990 ki diye mein nafrat paeda karne ki nakaam koshish kar chuki hai aur ab dobarah waisi hi sorat-e-haal paeda karne ki koshish kar rahi hai.
Hyderabad Hindustan ke shaan hai. yeh information technology aur dawasazi ke shobay mein arbon rupay ki sarmaya kaari ko Raghib kar raha hai. Amazon aur Micorsoft ne hyderabad mein apna dosra sab se bada aalmi marakaz qaim kiya hai. Tamam baradrion se taalluq rakhnay walay nojawanon ko mulazmat mil rahi hai. Owaisi ne mazeed kaha hai ke hyderabad mein tamam baradrion ke log hum ahangi ke sath rehtay hain aur saarhay chay saal se yahan koi firqa waranah mushkilaat nahi hain. unhon ne kaha yahan par musalman, Hindu, dalit, pasmandah tabqaat aur sikh sukoon se reh rahay hain. AIMIM apne mazhab aur zaat se qata nazar tamam logon ke liye kaam karti hai. Unhon ne nishandahi ki ke Telangana assembly mein AIMIM rehnuma aur unke bhai Akbaruddin Owaisi ne puranay shehar mein lal darwaaza ke mandir ke liye 10 crore rupaye ka mutalba kiya hai. unhon ne kaha ke unki party ne ek baar phir GHMC intikhabaat mein ghair muslims ko apne umeed waar ke tor par maidan mein utaara hai. unhon ne mazeed kaha BJP logon ko taqseem karti hai lekin hum inhen muttahid karte hain.