Hindustan mein khawateen ke khilaaf tashadud aur harasani ke waqeat tashweesh naak
Hyderabad: Riyasat Telangana ke dar-ul-hukoomat Hyderabad mein 2 roz qabal Ismat raizi aur qatal ke baad jalayi gayi khatoon Dr Priyanka Reddy ki halakat ke baad Hindustan mein ek martaba phir khawateen par tashadud aur Ismat raizi par behas chhed gayi hai jo shayad Nirbhaya waqea ke baad aisa waqea hai jis ne sab ki tavajja apni janib mabzol karwali hai jab ke hukoomat ki janib se haal hi mein jari ki gayi report mein bhi khatarnaak haqayiq bayan kiye gaye hain.
Hindustani hukoomat ke idaray National Crime Records Bureau ( NCRB ) ki janib se haal hi mein jari ki gayi report mein inkishaaf kiya gaya hai ke mulk mein har 15 minute mein ek khatoon ki Ismat raizi ki jati hai. NCBR ki report ke mutabiq hindustan bhar mein khawateen ke khilaaf tashadud, Ismat raizi, Un par tezaab se hamlay, Inhen harasan karne sameit deegar sanfi tafreeq ke waqeat mein izafah hogaya aur guzashta baras 2016 se ziyada juraim record kiye gaye. Report mein bataya gaya ke saal 2017 mein majmoi tor par Hindustan bhar mein khawateen ke khilaaf juraim-o-tashadud ke 3 Lakh 60 hazaar se zayed muqadmaat darj hue hain jin mein se ziyada tar Ismat raizi ke muqadmaat they.
Adaad-o-shumaar ke mutabiq sirf 2017 mein Hindustan bhar mein 3 Lakh 30 hazaar se zayed khawateen ki Ismat raizi aur ijtimai Ismat raizi hui hai. Darj shuda adaad-o-shumaar ke mutabiq Hindustan mein har 15 minute mein ek khatoon ki Ismat raizi aur har ek din baad kisi khatoon ki ijtimai Ismat raizi ki jati hai. Report se pata chalta hai ke mulk bhar mein 6 minute ke andar koi na koi khatoon bad sulooki,Harasani aur tashadud ka shikaar banti hai jab ke har 5 minute kisi na kisi khatoon ko apna shohar, Sasur ya deegar ahal khana nishana banatay hain. Khawateen par tashadud ke khilaaf mulk bhar mein muzahiray bhi hotay rehtay hain lekin is ke bawajood un masail par qaboo nai paaya ja raha hai.
Isi terhan har dhai din baad Hindustan mein kisi na kisi khatoon par tezaab se hamla kardiya jata hai jab ke har 2 ghantay baad kisi na kisi khatoon ki Ismat raizi ya ijtimai Ismat raizi ki nakaam koshish ki jati hai. Report ke mutabiq har dhai din baad kisi na kisi khatoon ko smuggle kiya jata hai. Sarkari adaad-o-shumaar ke mutabiq Ismat raizi ka nishana banai gayi khawateen ziyada tar jaan pehchan walay afraad, Rishta daaroun, doston aur madad karne wale afraad ki janib se nishana banti hain.
Tashadud, Bad sulooki, harasani aur Ismat raizi ka nishana ban’nay wali khawateen mein 6 saal ki bachiyon sameit 60 saal tak ki khawateen shaamil hain jab ke ziyada tar Ismat raizi aur ijtimai Ismat raizi ka nishana ban’nay wali khawateen mein nojawan 24 ta 29 saal ki omar ki khawateen hoti hain. Report ke mutabiq sirf saal 2017 mein hi Hindustan bhar mein 6 saal ki omar ki 298 bachiyoun ki Ismat raizi ka nishana banaya gaya. Report se pata chalta hai ke guzashta saal 30 hazaar se zayed khawateen ki un afraad ne Ismat raizi ki jinhein wo janti theen aur un par aitbaar karti theen. Report mein ye bhi bataya gaya ke khawateen ke khilaaf honay walay tashadud aur har terhan ke jinsi harasani ke waqeat mein 97 feesad un ke rishta daar, Dost, mohabbat karne walay aur jaan pehchan walay afraad mulawis hotay hain.