Dubai: Mumbai Indians ke Captain Rohit Sharma ne kaha ke chhautti martaba yaktarfa andaaz mein IPL ke pehlay qualifier mein Delhi Capitals ku 57 runs se shikast dainay ke baad team ne is match mein apni sab se behtareen karkardagi ka muzahira kiya.
Difai Champion aur 4 martaba ki faateh Mumbai ne pehlay qualifier mein muqarara 20 overs mein 5 wicket par 200 runs banaye aur Delhi ko 20 overs mein 8 wicket par 143 tak mehdood rakha. Mumbai ne is terhan chhutti martaba final mein jagah banali. Mumbai ne is se qabal 2010, 2013, 2015, 2017 aur 2019 mein final mein jagah banai thi.
Delhi ke liye is shikast ke baad pehli martaba final mein jagah bananay ki umeed abhi khatam nahi hui hai. Delhi ka muqaabla 8 November ko honay walay dosray qualifier mein Sunrisers Hyderabad aur Royal Challengers Bangalore ke mabain Eliminator ki faateh team se hoga aur yeh match jeetnay wali team 10 November ko final mein Mumbai se muqaabla kere gi.
Rohit Sharma ne match ke baad kaha ke mere khayaal mein yeh behtareen karkardagi thi. Mere jaldi out honay ke baad Quinton de Kock aur Suryakumar Yadav ne shandaar batting ki. Nateeja hamaray liye bohat acha raha. Hamara koi mansoobah nahi tha. Hum ek mukhtalif team hain aur hum mukhtalif andaaz mein khailtay hain. Hum chahtay thay ke team power play mein bohat umdah muzahira day kar match un ke haq mein kere.
Unhoun ne kaha ke Ishan Kishan bohat achi form mein hain aur hum chahtay thay ke woh misbet khelain. Hum ne Krunal se kaha ke woh misbet batting karen aur bowlers ku dabao mein rakhen. Bumrah aur Boult bohat umdah form mein hain. Dono ne mukhtalif teams ke khilaaf khela hai, Is liye un ke mukhtalif mansoobay hain. Ek team ki hesiyat se hamaray paas mukhtalif mansoobay hain aur inhen kamyabi mein dekh kar bohat acha lagta hai.