Riyadh: Saudi Arab ki tareekh mein pehli martaba khatoon police Mecca mein Hajjaj ki khidmat aur salamti par mamoor hain. Media ke mutabiq Mecca Police se munsalik khatoon police ohdedar afnan ne Al Akhbari channel se guftagu karte hue kaha ke aam dinoun ke muqablay mein Hajj mausam mein duty dushwaar hoti hai. Hajj mausam mein duty ka silsila 24 ghantay chalta hai. Aam dinoun ki khidmaat aur Hajj ayyaam ki khidmaat mein bada farq hai.
Khatoon police ohdedaron ne kaha hai ke mera Mecca ladies Police ke pehlay Badge se talluq hai. Hajj mausam mein aazmin ki khidmat karkay fakhr mehsoos kar rahi hon. Khatoon ohdedar Arij ne kaha ke English Lecturer mein B Honors hon. Darasal mere waalid Kuwait ki jung azaadi mein zakhmi hue they. Apne waalid ke mission ko mantaqi anjaam taq pohanchanay ke liye police mein aayi hon. Meri arzoo hai ke watan Aziz ki deegar ladkiyon ke liye misaal banon aur wo bhi watan aur muashray ki khidmat ke liye agay ayen aur apni salahiyaton ka muzahira karkay mulk o qoum ki taamer-o-taraqqi mein hissa len.