Ahmedabad : Gujrat ke shehar Ahmedabad ki fashion designing ki 24 sala Taliba Vrushti kothari jiski mubayyana ghumshudgi par adakara Soha Ali Khan ney Twitter par iski talaash karne ki appeal ki thi. taqreeban 12 dinoun ke sansani kheiz drama ke baad apne boy friend Shivam patel ke sath woh wapas lout aayi hai.
Crime branch ke joint commissionaire Ahay tomur ney kaha ke dono yahan se train se Dehli aur wahan se bus se himachal pradesh ke zila ke Kisoul gaye they.
Himalaya ke nazdeek waqay kisoul ke barey mein Shivam ney pata lagaya tha. woh dono kuch waqt akailey rehna chahtay they. chunkay is silsilay mein koi ba-zabta maamla darj nahi hai is liye police is muamlay ko khatam kar rahi hai. police is niji muamlay mein ziyada geherai se tahaqeeq nahi kar rahi hai. dono ziyada paise bhi lekar nahi gaye they aur kilo mein painting karkay kuch paise kamate they. police ki appeal par dono khud apni marzi se lautay hain, un par koi dabao nahi banaya gaya tha. wazeh rahay ke 29 September ko Vrushti shivam ke ghar gayi thi aur aglay din se dono la-patah hogaye they. is silsilay mein ghar walon ney Vrushti ki ghumshudgi ki report police thaanay mein darj karwai thi.
Un ke puranay phone number bhi band they. dono ko aakhri bar yaha railway station ke nazdeek ek auro se utartay hue CCTV mein dikhagya tha.
Vrushti ney do din pehlay apni maa ko ek E-mail bhej kar bataya tha ke usay nokari mil gayi hai aur woh theek se hai aur is ney ghar walon ko hui zehni takleef ke liye afsos zahir kiya tha. isi E-mail ki bunyaad par police ki crime branch ney dono ko dhoond nikala. soha jo ladki se waaqif hain, unhon ney 2 october ko iski tasweer ke sath is ke la patah honay ke barey mein tweet kar ke jald az jald is ka pata laganay ki appeal ki thi jiske baad se yeh muqadma kaafi surkhiyoun mein aagaya tha. –YTN STAFF