Gulbarga ke aazim e Hajj ka Makkah Muazzama mein intqaal

Hyderabad. Gulbarga (Kalaburagi) Riyasat Karnataka se talluq rakhnay walay aik aazim e Hajj Janab Abdussattar umar 69 saal ka gurday fail hojane ke baayis jumeraat ki subah Makkah Muazzama ke Al-Noor Hospital mein inteqaal hogaya. Woh cover number KAF-15503-2-0 ke tahet apni ahliya ke hamrah 10^th  August ko Hyderabad se ba azm Hajj rawana hue they. Special Officer Telangana State Hajj Committee Prof. SA Shukoor ney Hajj Mission aur khadim  ul Hujjaj ko un ki namaz e janaza aur tadfeen ke liye fauri karwaiyan karne ki hidayat di. Namaz e janaza Haram Shareef mein ada ki gayi aur tadfeen Makkah Mukarrama ke qabrastan Shaaryeen mein amal mein aayi. Sadarnasheen Telegana State Hajj Committee Janab Mohammad Masihullah Khan aur Special Officer Prof. SA Shukoor ney izhaar taaziyat karte hue marhoom ke ayizza ke liye saber Jameel ki talqeen ki. Iss dauraan Hyderabad embarkation point se talluq rakhnay walay tamam Hujjaj karaam Makkah Muazzama mein apni apni rehayish gaahon mein muqeem hain aur kheriyat se hain. Hajj Mission aur khadim ul Hujjaj se musalsal rabt rakha gaya hai aur Hujjaj karaam ki sehat o wo salamati ke talluq se maloomat haasil ki jarahi hain.