Hyderabad : GHMC Saroor nagar circle ke Tax inspector aur bill collector ko 80,000 Rupay ki rishwat ki raqam mangnay aur qubool karne par Anti corruption bureau ( ACB) ke ohdedaron nay jummay ke roz pakad liya.
Ohdedaron ke mutabiq, GHMC, Saroor nagar circle ke tax inspector M Ravi prasad ko is waqt pakda gaya, jab unhon nay jummay ki shaam ko Chaitaniyapuri ke Maruti nagar mein GHMC ward office mein isi halqa ke bill collector Jai Pochaiah ke zariye 80,000 Rupay rishwat maang rahay the.
Aur is raqam ka mutalba Pateru Janardhan Rao urf Sai Kumar se kiya gaya, jis nay tax ki dobarah towseeq karkay, izafah tax ki raqam ko kam karne aur sarkari tax ko teen saal ki bajaye ek saal karne ke liye kaha tha.
Pochaiah ke qabzay se 80,000 Rupay rishwat ki raqam Bar-aamad hui hai. ohdedaron ka kehna hai ke mulzim officers nay najaaiz faida uthane ke liye apne ohday ka ghalat istemaal kiya hai.
Un dono ko hirasat mein le liya gaya aur inhen SPE aur ACB, Hyderabad ke khusoosi judge ke samnay paish kiya gaya. mazeed tafteesh jaree hai. –YTN STAFF