Hyderabad: GHMC ke tamam 150 wards ke Ballot papers ki taba-at mukammal hogayi hai aur 27 November se sakht security mein GHMC zonal dafatir ko ye kaghzat rawana kiye jayenge.
Ballot paper mein har column mein aath umeed waar shaamil hosaktay hain aur jahan 8 se ziyada umeed waar muqaabla kar rahay hain wahan wo kaghaz 2 columns ke sath chaapay gaye hai jabkay, Jangamet ward mein jahan sab se ziyada 20 umeed waar muqaabla kar rahay hain yahan ke paper teen columns ke sath taba-at shuda hain Ballot papers ke sath hi polling ke deegar mawaad jaisay siyahi bhi isi din rawana ki jayegi.
GHMC coopration ki taiz tar muhim apne urooj par pahonch chuki hai kyunkay muqaabla mein hissa lainay wali jamaten raye dahindon ko raghib karne ke liye koi kasar nahi chodh rahi hain. Asal muqaabla karne wali jamaaton Bashmole TRS, congress, BJP aur majlis ke muqaabla karne walay sarkardah ledran ne silsila waar road shows, rallies, awaami jalson se khitaab ke sath sath tulu aftaab se ghuroob aftaab tak ghar ghar muhim chalarahe hain taakay raye dahindon ki himayat haasil hosakay. Is intikhabi muhim ke douran ilzamaat aur jawabi ilzamaat aur kayi tarhan ki riayaten aur waday kiye jarahay hain.
BJP GHMC per qabza ke liye tamam tar harbe istemaal kar rahi hai isne sarkardah leadron Bashmole markazi wazeer-e-dakhla ki khidmaat se istifada kiya hai taakay muhim chalaye jasakay.
Amit Shah imkaan hai ke shehar ka dora karte hue muhim chalayein aur baaz muntakhib rallies mein shareek honge. BJP ke qaumi saddar JP Nadda, Uttar pardesh ke chief minister Yogi adityanath, Maharashtra ke sabiq CM Devendra fadnavis bhi tawaqqa hai ke shehar mein BJP ke umeedwaron ke liye intikhabi muhim chalayeinge. muqaabla mein hissa lainay wali deegar do jamaaton TRS aur congress ne pehlay hi apna intikhabi manshoor jari kardiya hai jis mein raye dahindon se kayi waday kiye gaye.