Hyderabad: Greater Hyderabad municipal coropration ( GHMC ) ke intikhabaat ka aalamia jari kardiya gaya hai. Reyasti election commission ki janib se jari kardah aalamia ke mutabiq intikhabaat 1st December ko honge.
Telangana ke election commissioner ne Masab tank mein yeh aalamia jari kiya jiske mutabiq Hyderbad ke 150 wards ke intikhabaat honge.
1st December ko GHMC intikhabaat ke liye raye dahi hogi aur 4 december ko voton ki ginti hogi. 18 November se namzadgiyon ka aaghaz hoga. 20 November parcha namzadgi ke adkhal ki aakhri tareekh muqarrar ki gayi hai. 21 November ko namzadgyon ki jaanch ki jayegi. 22 November ko 3 bajey tak naam wapas liye jasaktay hain.
Partha Sarthi ne kaha ke yeh intikhabaat Ballot papers ke zareya honge. Mayor ka ohda khatoon ke liye mehfooz kiya gaya hai. Unhon ne kaha kay aaj se hi intikhabi zabita par amal shuru hogaya hai. GHMC hudood mein 38, 56, 770 mard aur 35, 46, 847 khawateen raye dahindgan hain jabkay 669 deegar zumre ke raye dahinde hain. 9248 polling marakiz ka qiyam amal mein layajayega.
Har marakiz raye dahi par chehra shanasi ke app ka istemaal kiya jayega.