Israeli Faujion ney jummey ke roz Palestine ke ilaqa Gaza ki sarhad par mukhtalif waqhiyat mein aik 12 sala ladke samait teen Falastinyon ko goli maar kar shaheed kar diya. Falastini wizarat dakhila ney kaha hai ke 12 sala ladke Shadi Abdul Aal ko Gaza ke shumali hissa mein goli maari gayi. Jab ke 21 sala Hani Afna aur Mohammad Shukor ko junoobi Gaza aur Al-Burj ke sahili ilaaqon mein do allag allag waqhiyat mein golian maar kar shaheed kiya gaya. Gaza ki wizarat sahet ke bayan ke mutabiq sarhad ke sath mukhtalif ilaaqon mein Falastinyon ke ehtejaj ke douran Israeli Faujion ki firing se kam az kam 50 afraad zakhmi bhi huwe. Gaza mein security zaraye ney bataya hai ke Gaza shehar ke qareeb Hamas ki aik chowki par aik Israeli tank ney chadhai kar di. Israel ki Fauj ney kaha hai ke Gaza ke mukhtalif hisson mein honey walay hungamon mein andazan 13 hazaar afraad shaamil thae. Un mein se kayi log tyre jala rahay thae aur kayi aatish geer madah phaink rahay thae. Baday paimanay par ehtejaj aur Israeli Security Forces ke sath jhadpon ka yeh naya silsila 30 March se shuru huwa tha aur tab se har jummay ko muzahiray kiye ja rahay hain. Is arsa ke douran Israeli firing se kam azkam 179 Falastini shaheed ho chuke hain. Israel ney Gaza ki patti ka muhasra kar rakha hai aur is ka kehna hai ke Hamas ko allag thalag karne ke liye aisa karna zaroori hai. 2008 se Israel aur Hamas ke darmiyan teen jaangein ho chuki hain. Insani huqooq ki tanzeemon ka kehna hai ke taqreeban 20 lakh abadi ka muhasra aik tarha se ijtemai saza ke mutaradif hai.