Hyderabad: Shehar Hyderabad ke Gandhi Hospital jis ko corona ke mareezoun ke ilaaj ka ek ahem markaz banaya gaya hai mein kaam karne walay Out Sourcing mulazimeen, Sanitization Workers, Security Guards aur Patient Care Staff ney aaj se hadtaal shuru kar di hai. Un mulazimeen ki hadtaal ko mazdoor union SITU ki taied haasil hai.
Guzashta kayi dinoun se Hospital mein kaam karne walay darjah chaharum ke mulazimeen tankhwahoun mein izafah ke sath sath kayi ek masail ki yaksoi ke liye intizamia aur hukomat se kayi martaba numaindagi kar chukay hain lekin un ke masail hal nahi kiye jarahay hain jis ke pesh e nazar aaj se ye hadtaal shuru ki gayi hai. Un mulazimeen ne kaha ke wo apni jaan par khail kar corona ke mareezoun ka ilaaj kar rahay hain taham un ko munasib tankhwahin ada nahi ki jarahi hain. Unhoun ne mutalba kiya keh hukoomat fori rad-e-amal zahir karte hue un ke mutalibaat ko poora kere. Is hadtaal ke nateeja mein hospital ki OP aur degar khidmat mutaser rahe.