Karachi : Pakistani team se fil haal bahar rehne walay fast bowler Mohammad Irfan ne 2012 may Hindustan aur Pakistan ke darmiyan honay wali series ka tazkara karte hue kaha ke hindustani baen haath ke sabiq opener Gautam Gambhir ke safaid gend ke career ko mein ne khatam kiya. 7 foot ek inch taweel qaamat aur Irfan ne mazkoorah series ke douran twenty 20 aur ODI mein 4 martaba Gautam Gambhir ko out kiya tha jiski wajah se England ke khilaaf baad mein honay wali series mein Gautam Gambhir ko team mein shaamil nahi kiya gaya tha.
Mohammad Irfan ne TV channel ko diye gaye apne ek interview mein daawa kiya hai ke jab mein Hindustan ke khilaaf 2012 may series mein team ka hissa tha to Gambhir meri raftaar aur mere qad ki wajah se kaafi pareshan rehtay they. Irfan ne daawa kiya hai ke yeh woh makhsoos series thi jis mein Gambhir ke career ko khatam kiya tha. unhon ne mazeed kaha ke Gambhir na sirf meri bowling ka saamna nahi karna chahtay balkay is series ke douran unhon ne mujh se aankhh bhi nahi milayi thi. ittafaq se Gambhir ne Hindustan ke liye aakhri twenty 20 muqaabla Pakistan ke khilaaf ahmedabad mein khela tha aur Pakistan series ke baad woh ODI mein bhi sirf ek martaba England ke khilaaf ODI khel paye they. 2012-13 series ke baad jo Pakistan ke khilaaf kheli gayi thi is mein Gambhir ke naaqis muzahiron ke baad inhen phir dobarah safaid gaind ki team mein shaamil nahi kiya gaya.
Irfan ne daawa kiya hai ke Gambhir unki bowling ka saamna karne se ghabrate they. unhon ne is mauqa par yeh bhi kaha ke Virat kohli ne Pakistan ke khilaaf honay wali series par izhar-e-khayal karte hue kaha tha ke Gambhir Irfan ki raftaar aur uchaal wali gaindoun ko samajh nahi paye they. iske alawa unhon ne yuvraj singh ka bhi hawala dete hue kaha ke jis waqt Gambhir unki bowling ka saamna kar rahay they to is waqt Yuvraj dosray suray par mojood they jinhon ne Gambhir ko kaha ke iski bowling par pul mat kar balkay kat kar lekin teesri gaind par pul karne ki koshish mein Gautam Gambhir wicketon ke peechay out hue they. –YTN STAFF